കൊണ്ടോട്ടി: കരിപ്പൂരില്‍ രണ്ട് യാത്രക്കാരില്‍ നിന്നായി 1528 ഗ്രാം സ്വര്‍ണം എയര്‍ കസ്റ്റംസ് ഇന്റലിജന്‍സ് പിടികൂടി. ദുബൈയില്‍ നിന്ന് എയര്‍ഇന്ത്യ എക്‌സ്പ്രസിലെത്തിയവരില്‍ നിന്നായി 45.84 ലക്ഷത്തിന്റെ സ്വര്‍ണമാണ് പിടിച്ചെടുത്തത്.
കോഴിക്കോട് കിഴക്കോത്ത് സ്വദേശി മുഹമ്മദ് ഷിഹാബുദ്ദീന്‍ മിശ്രിത രൂപത്തിലാക്കി ഒളിപ്പിച്ചു കടത്താന്‍ ശ്രമിച്ച 710 ഗ്രാം സ്വര്‍ണമാണ് കണ്ടെത്തിയത്. ശരീരത്തിലൊളിപ്പിച്ചായിരുന്നു ഇത് കൊണ്ടുവന്നത്. ഇതില്‍ നിന്ന് 596 ഗ്രാം സ്വര്‍ണമാണ് വേര്‍തിരിച്ചെടുത്തത്.
കാസര്‍കോട് ഉണ്ണികുളം സ്വദേശി മുഹമ്മദ് നയീമില്‍ നിന്നും 932 ഗ്രാമാണ് പിടികൂടിയത്. ധരിച്ചിരുന്ന അടിവസ്ത്രത്തിനുള്ളിലായിരുന്നു സ്വര്‍ണം ഒളിപ്പിച്ചത്. ആഭരണങ്ങളായിട്ടായിരുന്നു ഇവ കടത്താന്‍ ശ്രമിച്ചത്.