തിരുവനന്തപുരം: ഉന്നത വിദ്യാഭ്യാസ കൗണ്‍സിലിന് കീഴില്‍ രൂപീകരിച്ചിട്ടുള്ള സ്‌റ്റേറ്റ് അസസ്‌മെന്റ് ആന്റ് അക്രഡിറ്റേഷന്‍ സെന്ററി(സാക്)ന്റെ സംസ്ഥാനതല കണ്‍സണ്‍ട്ടേറ്റീവ് കോണ്‍ഫറന്‍സ് ഇന്ന്.
സാകിന്റെ പ്രവര്‍ത്തനമാര്‍ഗരേഖ ചര്‍ച്ച ചെയ്ത്, അന്തിമരൂപം നല്‍കുന്നതിനാണ് കോണ്‍ഫറന്‍സ്.
ഉന്നത വിദ്യാഭ്യാസ കൗണ്‍സില്‍ ബോര്‍ഡ് റൂമില്‍ രാവിലെ 10.30ന് ആരംഭിക്കുന്ന കോണ്‍ഫറന്‍സില്‍ നാഷനല്‍ ഇന്‍സ്റ്റിറ്റ്യൂട്ട് ഓഫ് എഡ്യുക്കേഷണല്‍ പ്ലാനിംഗ് ആന്‍ഡ് അഡ്മിനിസ്‌ട്രേഷന്റെ വൈസ് ചാന്‍സലര്‍ പ്രൊഫ. എന്‍.വി വര്‍ഗീസ്, തെലങ്കാന ഉന്നത വിദ്യാഭ്യാസ കൗണ്‍സില്‍ വൈസ് ചെയര്‍മാന്‍ പ്രൊഫ. വെങ്കിട്ട രമണ, സിങ്കപ്പൂര്‍ സര്‍വകലാശാലയുടെ മുന്‍ പ്രോ വൈസ് ചാന്‍സലര്‍ ഡോ. മോഹന്‍ മേനോന്‍, ഇന്‍ഡ്യന്‍ ഇന്‍സ്റ്റിറ്റ്യൂട്ട് ഓഫ് സയന്‍സിലെ പ്രൊഫസര്‍ എമിറിറ്റസ്, ഡോ. എന്‍.ജെ.റാവു തുടങ്ങിയവര്‍ ചര്‍ച്ചകള്‍ നയിക്കും.
ഉന്നത വിദ്യാഭ്യാസ കൗണ്‍സില്‍ വൈസ് ചെയര്‍മാന്‍ ഡോ. രാജന്‍ ഗുരുക്കള്‍ അധ്യക്ഷനാവും. ഉന്നത വിദാഭ്യാസ വകുപ്പ് പ്രിന്‍സിപ്പല്‍ സെക്രട്ടറി ഡോ. ഉഷാ ടൈറ്റസ്, സര്‍വകലാശാല വൈസ് ചാന്‍സലര്‍മാര്‍, ശാസ്ത്ര സാങ്കേതിക കൗണ്‍സിലിന്റെ മുന്‍ എക്‌സിക്യൂട്ടീവ് വൈസ് പ്രസിഡന്റ് ഡോ.സുരേഷ് ദാസ്, ആസൂത്രണ ബോര്‍ഡ് അംഗങ്ങളായ ഡോ. ബി. ഇക്ബാല്‍, ഡോ. രവിരാമന്‍, ലൈന്‍ ഡിപ്പാര്‍ട്ടുമെന്റ് മേധാവികള്‍, ഉന്നത വിദ്യാഭ്യാസ കൗണ്‍സില്‍ ഗവേണിങ് ബോഡി അംഗങ്ങള്‍, സര്‍വകലാശാലകളിലെ കോളജുകളിലെ ഐ.ക്യൂ, എ.സി കോര്‍ഡിനേറ്റര്‍മാര്‍ തുടങ്ങിയവര്‍ പങ്കെടുക്കും.