തിരുവനന്തപുരം: നിയമസഭയിലെ കൈയാങ്കളി കേസില്‍ മന്ത്രിമാരായ ഇ.പി ജയരാജന്‍, കെ.ടി ജലീല്‍ എന്നിവര്‍ക്ക് കോടതി ജാമ്യം അനുവദിച്ചു. 35,000 രൂപ വീതം കെട്ടിവച്ചാണ് ജാമ്യം അനുവദിച്ചത്. ആറ് ഇടത് നേതാക്കളാണ് കേസിലെ പ്രതികള്‍. കേസിലെ മറ്റ് നാല് പ്രതികള്‍ നേരത്തെ നേരിട്ട് ഹാജരായി ജാമ്യമെടുത്തിരുന്നു.
എല്ലാ പ്രതികളും വിടുതല്‍ഹരജി ഫയല്‍ ചെയ്തിട്ടുണ്ട്. കേസ് പിന്‍വലിക്കണമെന്ന ഹരജി ഹൈക്കോടതിയുടെ പരിഗണനയിലാണെന്ന് പ്രോസിക്യൂഷന്‍ അറിയിച്ചു. അടുത്ത മാസം മൂന്നിന് കേസ് പരിഗണിക്കും. 11 വരെ വിടുതല്‍ഹരജി നല്‍കാന്‍ കോടതി സമയം അനുവദിച്ചു.
കേസില്‍ തിരുവനന്തപുരം സി.ജെ.എം കോടതിയിലെ വിചാരണാ നടപടികള്‍ സ്റ്റേ ചെയ്യണമെന്ന ആവശ്യം ഹൈക്കോടതി തള്ളിയിരുന്നു. 2015ലാണ് ബാര്‍ കോഴ വിവാദത്തില്‍പ്പെട്ട കെ.എം മാണിയുടെ ബജറ്റ് അവതരണം തടസപ്പെടുത്തുന്നതിനിടെ നിയമസഭയില്‍ കൈയാങ്കളിയുണ്ടായത്. സ്പീക്കറുടെ കസേരയടക്കം മറിച്ചിട്ട അസാധാരണ പ്രതിഷേധത്തില്‍ രണ്ടര ലക്ഷം രൂപയുടെ നഷ്ടം ഉണ്ടാക്കിയെന്നാണ് ഇടത് നേതാക്കള്‍ക്കെതിരായ കേസ്. പൊതുമുതല്‍ നശിപ്പിച്ച കേസ് റദ്ദാക്കാനാനാകില്ലെന്ന് വിചാരണ കോടതി നേരത്തെ വ്യക്തമാക്കിയിരുന്നു.