കളമശ്ശേരി: കൊച്ചി മെട്രോ നിര്‍മാണ കരാറുകാരായ എല്‍ ആന്‍ഡ് ടിയില്‍ നിന്നും  88.90 ലക്ഷം രൂപ തട്ടിയെടുത്ത യുവാവ് പൊലിസ് പിടിയിലായി. കമ്പനിയിലെ കാഷ്യറായിരുന്ന തിരുവനന്തപുരം കണ്ണന്‍മൂല സരസാലയം വീട്ടില്‍ വിനോദ് ഒ നായരെ (33)യാണ്  കളമശേരി സി.ഐ സി.ജെ മാര്‍ട്ടിന്‍ അറസ്റ്റ് ചെയ്തത്.
സംഭവത്തെക്കുറിച്ച് പൊലിസ് പറയുന്നതിങ്ങനെ. മെട്രോ നിര്‍ നമാണ കരാര്‍ എറ്റെടുത്തപ്പോള്‍ മുതല്‍ എല്‍ ആന്‍ഡ് ടിയുടെ കൊച്ചി ഓഫിസിലെ കാഷ്യറായിരുന്നു വിനോദ്. കമ്പനിയുടെ ചെക്കുകള്‍ കൈകാര്യം ചെയ്തിരുന്നതും സൂക്ഷിച്ചിരുന്നതും ഇദ്ദേഹമായിരുന്നു.
മെയ് ആദ്യവാരമാണ് വിനോദ് നാല് ചെക്കുകളിലായി 88.90 ലക്ഷം തട്ടിയെടുത്തത്. രണ്ട് ചെക്ക് ഇയാള്‍ കൂട്ടുകാരന്റെ പേരിലും രണ്ട് ചെക്ക് സ്വന്തം പേരിലുമായാണ് എഴുതിയെടുത്തത്. മെയ് രണ്ടാം തിയതിക്കും അഞ്ചിനു മിടയിലാണ് ഇയാള്‍ ചെക്ക് മാറിയെടുത്ത്. എഴാം തിയതിയാണ് എല്‍ ആന്‍ഡ് ടിയുടെ ഉന്നത ഉദ്യോഗസ്ഥര്‍ വിവരമറിഞ്ഞത്. തുടര്‍ന്ന്  മാനേജര്‍ കളമശേരി പൊലിസ് സ്റ്റേഷനില്‍ പരാതി നല്‍കി. അപ്പോഴേക്കും വിനോദ് രാജ്യം വിട്ടിരുന്നു.
തുടര്‍ന്ന് അനേഷണത്തിന്റെ ഭാഗമായി എല്ലാ എയര്‍പോര്‍ട്ടുകളിലും കളമശേരി പൊലിസ് ലുക്ക് ഔട്ട് നോട്ടീസ് നല്‍കി. തായ്‌ലന്റിിലേക്ക് കടന്ന വിനോദ് കഴിഞ്ഞയാഴ്ച വിമാന മാര്‍ഗം നേപ്പാളിലെത്തി. അവിടെ നിന്ന് ബസ് മാര്‍ഗ്ഗം ബാഗ്ലൂരിലും. ഇവിടെ നിന്ന് ദുബായിലേക്ക് കടക്കാന്‍ എയര്‍പോര്‍ട്ടിലെത്തിയപ്പോള്‍ എയര്‍പോര്‍ട്ട് ഉദ്യോഗസ്ഥര്‍ വിനോദിനെ തടഞ്ഞ് വെച്ച് കളമശേരി പൊലിസില്‍ വിവരമറിയിക്കുകയായിരുന്നു. തുടര്‍ന്നാണ് പൊലിസ് ഇയാളെ അറസ്റ്റ് ചെയ്തത്.
ഇയാളുടെ പേരില്‍ ബാങ്കിലുണ്ടായിരുന്ന ഒന്‍പത് ലക്ഷം രൂപ പൊലിസ് മരവിപ്പിച്ചിരുന്നു. ബാക്കി 80 ലക്ഷം രൂപ കടം വീട്ടാനും മറ്റുമായി ഉപയോഗിച്ചെന്നാണ് ഇയാള്‍ പറഞ്ഞിട്ടുള്ളത്. പ്രതിയെ കളമശേരി ഫസ്റ്റ് ക്ലാസ് ജുഡിഷ്യല്‍ മജിസ്‌ടേറ്റ് കോടതിയില്‍ ഹാജരാക്കി.