അങ്കാറ: യൂറോകപ്പ് യോഗ്യതാ മത്സരത്തില്‍ ലോക ചാംപ്യന്മാര്‍ക്ക് അട്ടിമറിത്തോല്‍വി. ഇന്നലെ നടന്ന മത്സരത്തില്‍ തുര്‍ക്കിയാണ് നിലവിലെ യൂറോ റണ്ണേഴ്‌സ്അപ്പും കൂടിയായ ഫ്രാന്‍സിനെ അട്ടിമറിച്ചത്.

എതിരില്ലാത്ത രണ്ട് ഗോളുകള്‍ക്കാണ് തുര്‍ക്കിയുടെ വിജയം. തുര്‍ക്കിക്ക് വേണ്ടി കാന്‍ അയാന്‍, ചെങ്കിസ് ഉന്ദര്‍ എന്നിവര്‍ വലചലിപ്പിച്ചു.
ഹോം മൈതാനത്തിന്റെ ആനൂകൂല്യം മുതലെടുത്ത് ആക്രമിച്ച് കളിച്ച തുര്‍ക്കി മത്സരത്തിലുടനീളം മികച്ച പ്രകടനമാണ് കാഴ്ചവച്ചത്. ഫ്രഞ്ച് ഗോള്‍മുഖത്ത് 11 തവണ ഭീതിവിതച്ച അവര്‍ ആറ് ഷോട്ടുകള്‍ ലക്ഷ്യത്തിലേക്ക് തൊടുത്തെങ്കിലും ഗോള്‍കീപ്പര്‍ ലോറിസിന്റെ മിന്നും സേവുകള്‍ ഫ്രാന്‍സിനെ ഒരു വലിയ തോല്‍വിയില്‍നിന്ന് കരകയറ്റുകയായിരുന്നു.

തുര്‍ക്കി പ്രതിരോധം കടന്ന് ഫ്രാന്‍സ് ഒറ്റ ഷോട്ട് പോലും ലക്ഷ്യത്തിലേക്ക് പായിച്ചില്ല. പ്രമുഖ താരപ്പടകളുമായി തുര്‍ക്കിയെ നേരിടാനെത്തിയ ഫ്രാന്‍സിന് തുടക്കം മുതലേ പിഴച്ചു. തിരമാല പോലെ ആഞ്ഞടിച്ച തുര്‍ക്കി മുന്നേറ്റം ഫ്രഞ്ച് പ്രതിരോധത്തില്‍ തലവേദന സൃഷ്ടിച്ചു. 30ാം മിനുട്ടിലാണ് മത്സരത്തിലെ ആദ്യ ഗോള്‍ വീഴുന്നത്. മൈതാനത്തിന്റെ ഇടതു ഭാഗത്തുനിന്ന് ലഭിച്ച ഫ്രീകിക്ക് മികച്ച ഹെഡ്ഡറിലൂടെ കാന്‍ അയാന്‍ ലക്ഷ്യത്തിലെത്തിക്കുകയായിരുന്നു. 10 മിനുട്ടിനുള്ളില്‍ തന്നെ തുര്‍ക്കി അടുത്ത ഗോളും നേടി. പാസിങ് ഗെയിമിനൊടുവില്‍ ബോകിസിനുള്ളില്‍നിന്ന് മികച്ച ഷോട്ടിലൂടെയാണ് ചെങ്കിസ് പന്ത് വലയിലാക്കിയത്. മത്സരത്തില്‍ പന്ത് കൈവശംവച്ച് കളിച്ചത് ഫ്രാന്‍സാണെങ്കിലും മികച്ച ഗോളവസരങ്ങള്‍ സൃഷ്ടിച്ചത് തുര്‍ക്കിയായിരുന്നു. മറ്റു മത്സരങ്ങളില്‍ ഇറ്റലി 3-0ത്തിന് ഗ്രീസിനെയും ബെല്‍ജിയം 3-0ത്തിന് കസാക്കിസ്ഥാനെയും ജര്‍മനി 2-0ത്തിന് ബെലാറസിനെയും തകര്‍ത്തു.