ലണ്ടന്‍: ഇന്ത്യ-ആസ്‌ത്രേലിയ ക്രിക്കറ്റ് കളി കാണാനെത്തി മദ്യ വ്യവസായി വിജയ് മല്യ. ബാങ്കുകളില്‍നിന്ന് വായ്പയെടുത്ത് രാജ്യം വിട്ട മല്യയെ യു.കെയില്‍നിന്ന് ഇന്ത്യയിലേക്ക് നാടുകടത്താനുള്ള നടപടികള്‍ പുരോഗമിക്കുന്നതിനിടെയാണ് ലണ്ടനിലെ കാന്നിങ്ടണില്‍ ഇന്നലെ നടന്ന മത്സരം വീക്ഷിക്കാനായി എത്തിയത്. താന്‍ കളികാണാനാണ് ഇവിടെ എത്തിയതെന്നും ജൂലൈയില്‍ നടക്കുന്ന വിചാരണക്കായുള്ള നടപടികള്‍ പുരോഗമിക്കുകയാണെന്നും അദ്ദേഹം പറഞ്ഞു.

മാധ്യമപ്രവര്‍ത്തകരുടെ കൂടുതല്‍ ചോദ്യങ്ങളില്‍നിന്ന് അദ്ദേഹം ഒഴിഞ്ഞ് മാറി. സാമ്പത്തിക തട്ടിപ്പ്, ഗൂഢാലോചന ഉള്‍പ്പെടെയുള്ള കേസുകളില്‍ മല്യയെ ഇന്ത്യയിലേക്ക് നാടുകടത്താന്‍ വെസ്റ്റ്മിന്‍സ്റ്റര്‍ കോടതി കഴിഞ്ഞ വര്‍ഷമാണ് ഉത്തരവിട്ടത്. ഉത്തരവില്‍ യു.കെ ആഭ്യന്തര സെക്രട്ടറി ഒപ്പിട്ടിരുന്നു. നാടുകടത്തിലിനെതിരേയുള്ള വിജയ് മല്യയുടെ അപ്പീല്‍ യു.കെ കോടതി ഏപ്രില്‍ എട്ടിന് തള്ളിയിരുന്നു.