തൃശൂര്‍: ആധാര്‍ എന്റോള്‍മെന്റിന് ഐറിസ് നിര്‍ബന്ധമാക്കിയ ഉത്തരവ് പിന്‍വലിക്കാത്ത സാഹചര്യത്തില്‍ ഇന്ന് മുതല്‍ 72 മണിക്കൂര്‍ നേരം എന്റോള്‍മെന്റ് നിര്‍ത്തിവച്ച് അക്ഷയകേന്ദ്രങ്ങള്‍ പ്രതിഷേധിക്കുമെന്ന് അസോസിയേഷന്‍ ഒഫ് ഐ.ടി. എംപ്ലോയിസ് (സി.ഐ.ടി.യു) ഭാരവാഹികള്‍ വാര്‍ത്താസമ്മേളനത്തില്‍അറിയിച്ചു.
സുരക്ഷാ കാരണങ്ങളാല്‍ ഓരോ ആധാര്‍ എന്റോള്‍മെന്റിനും ഒപ്പം ഓപ്പറേറ്ററുടെ കണ്ണിലെ റെറ്റിന കൂടി സ്‌കാന്‍ ചെയ്യണമെന്നാണ് പുതിയ നിബന്ധന. ഇത് ഓപ്പറേറ്റര്‍മാര്‍ക്ക് ആരോഗ്യപരമായി ബുദ്ധിമുട്ട് ഉണ്ടാക്കുന്നതാണെന്നാണ് വാദം.
ഈ സാഹചര്യത്തില്‍ ഉത്തരവ് പിന്‍വലിക്കണമെന്നാവശ്യപ്പെട്ട് അക്ഷയകേന്ദ്രങ്ങള്‍ ബന്ധപ്പെട്ടവര്‍ക്ക് കത്ത് നല്‍കിയിരുന്നെങ്കിലും അനുകൂല നടപടി ഉണ്ടായിട്ടില്ല. സൂചനാ പ്രതിഷേധം നടത്തിയിട്ടും ഉത്തരവ് പിന്‍വലിക്കുന്നില്ലെങ്കില്‍ അനിശ്ചിതകാല സമരവുമായി മുന്നോട്ടുപോകുമെന്നും നേതാക്കള്‍ പറഞ്ഞു. വാര്‍ത്താസമ്മേളനത്തില്‍ എ.ഡി ജയന്‍, ഷംസു കല്ലൂര്‍, പി.ജി ഗിനില്‍ പങ്കെടുത്തു.