ന്യൂഡല്‍ഹി: സി.പി.എമ്മിനേറ്റ കനത്ത തോല്‍വിയുടെ പശ്ചാത്തലത്തില്‍ കേന്ദ്ര കമ്മിറ്റി യോഗത്തിന്റെ ആദ്യ ദിവസം തന്നെ താന്‍ ജനറല്‍ സെക്രട്ടറി സ്ഥാനത്തു നിന്നു രാജിക്കൊരുങ്ങിയിരുന്നു എന്ന് സീതാറാം യെച്ചൂരി. എന്നാല്‍ കേന്ദ്ര കമ്മിറ്റി ഇത് വിലക്കുകയായിരുന്നുവെന്നും അദ്ദേഹം പറഞ്ഞു. ഇന്നലെ കേന്ദ്ര കമ്മിറ്റി തീരുമാനങ്ങള്‍ വിശദീകരിക്കവേയാണ് യെച്ചൂരി ഇക്കാര്യം തുറന്നു പറഞ്ഞത്.
ബംഗാള്‍ പാര്‍ട്ടി സെക്രട്ടറി സൂര്യകാന്ത് മിശ്ര രാജിക്കൊരുങ്ങിയിരുന്നോ എന്ന ചോദ്യത്തിന് തോല്‍വിക്ക് എല്ലാവരും ഉത്തരവാദികളാണെന്നും നേതാക്കള്‍ രാജിവെച്ചത് കൊണ്ടു പരിഹാരമുണ്ടാകില്ലെന്നുമായിരുന്നു യെച്ചൂരിയുടെ മറുപടി.
ബംഗാളില്‍ മമത ബാനര്‍ജി സര്‍ക്കാരിനെതിരേ വലിയ തോതില്‍ ഭരണവിരുദ്ധ വികാരം ഉണ്ടായിരുന്നുവെന്നത് തിരിച്ചറിയാന്‍ പാര്‍ട്ടിക്ക് കഴിഞ്ഞില്ല. തൃണമൂല്‍ കോണ്‍ഗ്രസിനെ ബി.ജെ.പി തുരത്തിയോടിക്കുന്നതിനിടെ തങ്ങളുടെ പാര്‍ട്ടി ഓഫിസുകളില്‍ ഏറിയ പങ്കും തിരിച്ചു പിടിക്കാന്‍ കഴിഞ്ഞിട്ടുണ്ടെന്നും യെച്ചൂരി പറഞ്ഞു.
സി.പി.എം പി.ബിയില്‍ ഐക്യം വേണമെന്ന പ്ലീനം നിര്‍ദേശം നടപ്പായിട്ടുണ്ടോ എന്നും പരിശോധിക്കുമെന്നും യെച്ചൂരി പറഞ്ഞു. കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയുടെ രാജി തീരുമാനത്തെ രക്ഷപെടല്‍ തന്ത്രം എന്നാണ് യെച്ചൂരി വിശേഷിപ്പിച്ചത്. പാര്‍ട്ടി കേന്ദ്ര കമ്മിറ്റി തന്നെ രാഹുലിന്റെ രാജി സന്നദ്ധതയെ ഇതേ രീതിയിലാണ് വിലയിരുത്തിയിരിക്കുന്നതെന്നും അദ്ദേഹം പറഞ്ഞു. പ്ലീനം തീരുമാനങ്ങള്‍ നടപ്പാക്കിയിട്ടുണ്ടോ എന്ന കാര്യം പ്രത്യേകം പരിശോധന നടത്തും. പ്രതിപക്ഷ ഐക്യം രൂപപ്പെടുത്തുന്നതില്‍ കോണ്‍ഗ്രസ് പരാജയപ്പെട്ടു.
തെരഞ്ഞെടുപ്പു കമ്മീഷന്‍ നിയമനത്തില്‍ അടിമുടി പരിഷ്‌കരണം വേണം. തെരഞ്ഞെടുപ്പു കമ്മിഷനെ നിയമിക്കുന്ന രീതിയില്‍ തന്നെ മാറ്റമുണ്ടാകണം. രാഷ്ട്രപതിയുടെ നേതൃത്വത്തില്‍ ഉള്ള ഒരു കൊളീജിയം ആയിരിക്കണം തെരഞ്ഞെടുപ്പു കമ്മിഷനെ നിയമിക്കേണ്ടതെന്നും യെച്ചൂരി പറഞ്ഞു.
കേരളത്തില്‍ കനത്ത തിരിച്ചടിയുണ്ടായെങ്കിലും തിരിച്ചുവരവിന്റെ പൂര്‍ണ്ണ ഉത്തരവാദിത്തം കേരളാ ഘടകത്തിന് തന്നെ കേന്ദ്ര നേതൃത്വം നല്‍കി. കേരളത്തില്‍ വിശ്വാസ സമൂഹത്തെ കോണ്‍ഗ്രസും ബി.ജെ.പിയും തെറ്റിദ്ധരിപ്പിച്ചതാണ് പരാജയത്തിന് കാരണമായതെന്നും സി.പി.എം കേന്ദ്ര കമ്മിറ്റിയും വിലയിരുത്തി.
നിയമസഭ തെരഞ്ഞെടുപ്പിലൂടെ ശക്തി വീണ്ടെടുക്കാന്‍ സംസ്ഥാന നേതൃത്വത്തിന് പ്രാപ്തിയുണ്ട്. അക്കാര്യത്തില്‍ കേന്ദ്ര നേതൃത്വത്തിന്റേതായ ഒരു പരിഹാര നിര്‍ദേശം തല്‍കാലം കേരളത്തിലേക്കു വേണ്ടെന്ന നിലപാടാണ് സി.പി.എം കേന്ദ്രകമ്മിറ്റിയും സ്വീകരിച്ചത്.
കേരളത്തില്‍ ശബരിമല വിഷയത്തില്‍ സുപ്രിംകോടതി വിധി നടപ്പാക്കിയ എല്‍.ഡി.എഫ് സര്‍ക്കാരിനെക്കുറിച്ച് ബി.ജെ.പിയും കോണ്‍ഗ്രസും വിശ്വാസി സമൂഹത്തെ തെറ്റിദ്ധരിപ്പിച്ച് ഒപ്പം നിര്‍ത്തുകയായിരുന്നു എന്നും യെച്ചൂരി പറഞ്ഞു.