തിരുവനന്തപുരം: പാലാരിവട്ടം മേല്‍പ്പാല നിര്‍മാണത്തില്‍ ആരൊക്കെ അഴിമതി നടത്തിയിട്ടുണ്ടോ അവരിലാരും രക്ഷപ്പെടില്ലെന്ന് മുഖ്യമന്ത്രി പിണറായി വിജയന്‍. പൊതുമരാമത്ത് വകുപ്പില്‍ അടിമുടി അഴിമതിയാണെന്ന് 2015 ലെ വിജിലന്‍സ് റിപ്പോര്‍ട്ടില്‍ പറയുന്നു.
വിജിലന്‍സ് റിപ്പോര്‍ട്ട് അവഗണിച്ചതിന്റെ ദുരന്തമാണ് പാലാരിവട്ടം മേല്‍പ്പാലത്തിനുണ്ടായത്. അഴിമതി കാണിച്ചവര്‍ക്കെതിരേ കര്‍ശന നടപടിയുണ്ടാകുമെന്നും മുഖ്യമന്ത്രി പറഞ്ഞു.
മേല്‍പ്പാലനിര്‍മാണത്തില്‍ കിറ്റ്ക്കോയ്ക്ക് ഗുരുതര വീഴ്ച്ച സംഭവിച്ചതായി പൊതുമരാമത്ത് മന്ത്രി ജി സുധാകരന്‍ പറഞ്ഞു. മേല്‍നോട്ട ചുമതല ഉണ്ടായിരുന്ന കിറ്റ്‌കോ അത് വേണ്ടവിധം ചെയ്തില്ലെന്നും പാലത്തിന്റെ ഡിസൈനിലും നിര്‍മാണത്തിലും മേല്‍നോട്ടത്തിലും അപാകതയുണ്ടാക്കിയെന്നും സുധാകരന്‍ വ്യക്തമാക്കി.
നിയമസഭയില്‍ ചോദ്യത്തിനുള്ള മറുപടിയിലാണ് ഇരുവരും നിലപാട് വ്യക്തമാക്കിയത്.
യുഡിഎഫ് സര്‍ക്കാറിന്റെ കാലത്ത് 12 തവണ ഡയറക്ടര്‍ ബോര്‍ഡ് കൂടിയെങ്കിലും പാലത്തിലെ തകരാറുകള്‍ ശ്രദ്ധിച്ചില്ല.
കിറ്റ്കോ നടത്തിയ എല്ലാ നിര്‍മാണ പ്രവര്‍ത്തനങ്ങളും അന്വേഷിക്കുമെന്നും മന്ത്രി വ്യക്തമാക്കി.