ജിദ്ദ: സഊദിയില്‍ കൃത്യ സമയത്ത് ഇഖാമ പുതുക്കണമെന്ന് പാസ്പാര്‍ട്ട് വിഭാഗം മുന്നറിയിപ്പ് നല്‍കി. ഇഖാമ പുതുക്കാന്‍ വീഴ്ച വരുത്തിയാല്‍ പിഴ ഒടുക്കേണ്ടിവരും. ഇഖാമ പുതുക്കാത്തതിന്റെ പേരില്‍ മൂന്നാം തവണ പിടികൂടിയാല്‍ നാടുകടത്തുമെന്നും സഊദി പാസ്‌പോര്‍ട്ട് വിഭാഗം ജവാസാത്ത് മുന്നറിയിപ്പ് നല്‍കി.

സഊദിയിലുള്ള വിദേശികള്‍ അവരുടെ തിരിച്ചറിയല്‍ രേഖയായ ഇഖാമ കാലാവധി അവസാനിക്കും മുമ്പ്തന്നെ പുതുക്കിയിരിക്കണം. അല്ലാത്ത പക്ഷം പിടിക്കപ്പെട്ടാല്‍ ആദൃ തവണ അഞ്ഞൂറ് സഊദി റിയാല്‍ പിഴ ഒടുക്കേണ്ടിവരും. ഇഖാമ പുതുക്കാതെ രണ്ടാം തവണയും പിടിക്കപ്പെട്ടാല്‍ പിഴ സംഖൃ ആയിരം റിയാലായി വര്‍ദ്ദിക്കും. മുന്നാം തവണയും പിടികൂടിയാല്‍ ഇത്തരക്കാരെ നാടുകടത്തുമെന്നും പാസ്‌പോട്ട് വിഭാഗം ഡയറക്ടര്‍ ജനറല്‍ മുന്നറിയിപ്പ് നല്‍കി. വിദേശികള്‍ക്ക് അവരുടെ ഇഖാമ കാലാവധിയും പുതുക്കേണ്ട തിയ്യതിയും ഉറപ്പുവരുത്താന്‍ നിലവില്‍ സൗകരൃമുണ്ട്.

സഊദി ആഭൃന്തര മന്ത്രാലയത്തിനു കിഴിലുള്ള അബ്ഷീര്‍, മുഖീം എന്നീ പോര്‍ട്ടലുകള്‍ വഴി ഇഖാമയുടെ കാലാവധി അറിയുവാനും പുതുക്കേണ്ട സമയം അറിയുവാനും സാധിക്കും. ഇതു വഴി പരിശോധന നടത്തി പിഴ കൂടാതെ ഇഖാമ പുതുക്കി രാജ്യം അനുശാസിക്കുന്ന രീതിയില്‍ ജോലി ചെയ്യാന്‍ എല്ലാ വിദേശികളും ശ്രദ്ദിക്കണമെന്നും ,മന്ത്രാലയം ഓര്‍മിപ്പിച്ചു .