കോഴിക്കോട്: ബിരുദ വിദ്യാര്‍ഥികള്‍ക്കായി എസ്.കെ.എസ്.എസ്.എഫ് ട്രെന്റ് സംസ്ഥാന സമിതി വിഭാവനം ചെയ്ത സ്‌പെയ്‌സ് പദ്ധതിയുടെ ഗ്രാന്റ്റ് ഫിനാലെ ഒക്ടോബര്‍ 30,31 തിയതികളിലായി വിവിധ പരിപാടികളോടെ സമാപിച്ചു. നാല് ഘട്ടങ്ങളിലായി സംസ്ഥാനത്തെ 11 ജില്ലകളില്‍ നിന്നുള്ള 50 മേഖലകളിലെ 810 വിദ്യാര്‍ഥികളാണ് കോഴ്‌സ് വിജയകരമായി പൂര്‍ത്തീകരിച്ചത്. ഒരു മാസം നീണ്ടു നിന്ന കോഴ്‌സില്‍ ജീവിത നൈപുണി പരിശീലനവും മത്സര പരീക്ഷകളിലെ വിഷയ സംബന്ധമായ ക്‌ളാസുകളുമാണ് പ്രധാനമായും നടന്നത്. ട്രെന്റ് റിസോഴ്‌സ് ബാങ്കിലെ ട്രൈനര്‍മാരാണ് ക്ലാസുകള്‍ക്ക് നേതൃത്വം നല്‍കിയത്.
പദ്ധതി പൂര്‍ത്തീകരിച്ച വിദ്യാര്‍ഥികള്‍ക്കായി പൂര്‍ണമായും പി.എസ്.സി രൂപത്തില്‍ മാതൃകാ മത്സര പരീക്ഷ നടത്തി. ട്രെന്റ് സ്ഥാപക ഡയറക്ടര്‍ എസ്.വി മുഹമ്മദലി മാസ്റ്റര്‍ ഉദ്ഘാടനം ചെയ്തു. കെ. ഇ മുഹമ്മദ് റാഫി മത്സര പരീക്ഷകള്‍ക്കൊരാമുഖം എന്ന സെഷന്‍ അവതരിപ്പിച്ചു.
ഒക്ടോബര്‍ 31ന് നടന്ന സമാപന സെഷനില്‍ എസ്.കെ.എസ്.എസ്.എഫ് സംസ്ഥാന ജനറല്‍ സെക്രട്ടറി സത്താര്‍ പന്തലൂര്‍ മാതൃക പരീക്ഷയിലെ റാങ്ക് ജേതാക്കളെ പ്രഖ്യാപിച്ചു.
തുടര്‍ന്ന് സര്‍ട്ടിഫിക്കറ്റ് വിതരണം നടത്തി. സംസ്ഥാന ട്രെന്റ് ചെയര്‍മാന്‍ റഷീദ് കൊടിയൂറ, സ്‌പെയ്‌സ് കോര്‍ഡിനേറ്റര്‍ കെ.കെ മുനീര്‍ വാണിമേല്‍, ഡോ. മജീദ് കൊടക്കാട്, ഡോ. അബ്ദുല്‍ ഖയ്യൂം കടമ്പോട്, ശാഫി മാസ്റ്റര്‍ ആട്ടീരി, സിദ്ദീഖുല്‍ അക്ബര്‍ വാഫി, എസ്.കെ ബശീര്‍ തുടങ്ങിയവര്‍ സംബന്ധിച്ചു.