തൃശൂര്‍: സംസ്ഥാനത്ത് ജൂണ്‍ 18ന് മോട്ടോര്‍ വാഹന പണിമുടക്ക്. മോട്ടോര്‍ വാഹന സംരക്ഷണ സമിതിയാണ് പണിമുടക്കിന് ആഹ്വാനം ചെയ്തത്. വാഹനങ്ങള്‍ക്ക് ജി.പി.എസ്. നിര്‍ബന്ധമാക്കല്‍, ഇന്‍ഷുറന്‍സ് പ്രീമിയം തുക വര്‍ധന എന്നിവയില്‍ പ്രതിഷേധിച്ചാണ് പണിമുടക്ക്. ബസ്, ഓട്ടോ, ടാക്‌സി, ലോറി എന്നീ വാഹനങ്ങള്‍ പണിമുടക്കില്‍ പങ്കെടുക്കും. തൃശൂരില്‍ ചേര്‍ന്ന സമിതി യോഗത്തിലാണ് പണിമുടക്ക് സംബന്ധിച്ച തീരുമാനമെടുത്തത്.
ഓട്ടോറിക്ഷ ഒഴികെയുള്ള പൊതു ഗതാഗത വാഹനങ്ങളില്‍ ജൂണ്‍ ഒന്ന് മുതല്‍ ജി.പി.എസ് ഘടിപ്പിക്കണമെന്ന് സര്‍ക്കാര്‍ നിര്‍ദേശിച്ചിരുന്നു. ഉപകരണങ്ങള്‍ വേണ്ടത്ര ലഭ്യമല്ലെന്ന വാഹന ഉടമകളുടെ വാദം പരിഗണിച്ച് മോട്ടോര്‍ വാഹന വകുപ്പ് തല്‍ക്കാലം വാഹനങ്ങള്‍ പരിശോധിക്കുന്നില്ലെന്ന തീരുമാനമെടുത്തിരുന്നു.