പെരിന്തല്‍മണ്ണ: പുതിയ അധ്യയന വര്‍ഷത്തിലെ മദ്‌റസാ പഠനാരംഭത്തിന്റെ ഭാഗമായി 'നേരറിവ് നല്ല നാളേക്ക് 'എന്ന പ്രമേയത്തില്‍ സമസ്ത കേരള ജംഇയ്യത്തുല്‍ മുഅല്ലിമീന്‍ സെന്‍ട്രല്‍ കൗണ്‍സില്‍ നടത്തുന്ന 'മിഹ്‌റജാനുല്‍ ബിദായ' ആഘോഷത്തിന്റെ സംസ്ഥാനതല ഉദ്ഘാടനം ഇന്ന് പെരിന്തല്‍മണ്ണ പുത്തനങ്ങാടി മൂച്ചിക്കല്‍ ഹിദായത്തുസ്സ്വിബ്‌യാന്‍ മദ്‌റസയില്‍ നടക്കും. വൈകിട്ട് 4 മണിക്ക് സമസ്ത കേരളാ ജംഇയ്യത്തുല്‍ ഉലമാ പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ ഉദ്ഘാടനം ചെയ്യും.
സമസ്ത ജനറല്‍ സെക്രട്ടറി പ്രൊഫ.കെ.ആലിക്കുട്ടി മുസ്‌ലിയാര്‍ അധ്യക്ഷനാകും. സമസ്ത കേരളാ ഇസ്‌ലാം മത വിദ്യാഭ്യാസ ബോര്‍ഡ് ജനറല്‍ സെക്രട്ടറി എം.ടി അബ്ദുല്ല മുസ്‌ലിയാര്‍ മുഖ്യപ്രഭാഷണം നടത്തും. എസ്.കെ.ജെ.എം.സി.സി സെക്രട്ടറി ഡോ. ബഹാഉദ്ദീന്‍ മുഹമ്മദ് നദ്‌വി, ഹാഫിള് സിറാജുദ്ധീന്‍ ഖാസിമി പത്തനാപുരം പ്രസംഗിക്കും. സയ്യിദ് സാബിഖലി ശിഹാബ് തങ്ങള്‍ പാഠപുസ്തക വിതരണം നടത്തും. മിഹ്‌റജാനുല്‍ ബിദായ ആഘോഷ പരിപാടിയുടെ ജില്ലാതല ഉദ്ഘാടനങ്ങള്‍ തുടര്‍ ദിവസങ്ങളില്‍ വിവിധ ജില്ലകളില്‍ നടക്കും. മദ്‌റസകളില്‍ ശനിയാഴ്ചയാണ് പുതിയ അധ്യയന വര്‍ഷം ആരംഭിക്കുന്നത്.