തളിപ്പറമ്പ്: ഉദയ സ്വാശ്രയ സംഘത്തിന്റെയും വിമുക്ത ഭടന്മാരുടെ കൂട്ടായ്മയുടെയും സംയുക്ത ആഭിമുഖ്യത്തില്‍ കരിമ്പം കാര്‍ഗില്‍ സ്‌ക്വയറിലെ കാര്‍ഗില്‍ സ്തൂപത്തില്‍ പുഷ്പാര്‍ച്ചനയും കാര്‍ഗില്‍ വിജയദിനാചരണവും നടത്തി. നിരവധി വിമുക്ത ഭടന്മാരും,സ്വാശ്രയ സംഘം പ്രവര്‍ത്തകരും,നാട്ടുകാരും പങ്കെടുത്ത ചടങ്ങില്‍ രാജ്യത്തിനുവേണ്ടി ജീവത്യാഗം ചെയ്ത വീര ജവാന്മാരുടെ സ്മരണ പുതുക്കി.

1999ല്‍ ചരിത്രപരമായ കാര്‍ഗില്‍ യുദ്ധ വിജയത്തിനുശേഷം കണ്ണൂര്‍ ജില്ലയില്‍ സ്ഥാപിക്കപ്പെട്ട സ്മാരകങ്ങളില്‍ പ്രധാനപ്പെട്ടതാണ് തളിപ്പറമ്പ് ഇരിട്ടി സംസ്ഥാന പാതയില്‍ ഇ.ടി.സിക്ക് സമീപമുള്ള കാര്‍ഗില്‍ സ്തൂപം. ഇതുവഴി കടന്നുപോകുന്ന മിലിട്ടറി വാഹനങ്ങളിലെ ജവാന്മാര്‍ സ്തൂപത്തിനരികില്‍ നിര്‍ത്തി അഭിവാദ്യങ്ങള്‍ അര്‍പ്പിക്കാറുണ്ട്. ചടങ്ങില്‍ പങ്കെടുത്ത വിമുക്ത ഭടന്മാര്‍ അവരുടെ യുദ്ധാനുഭവങ്ങള്‍ പങ്കുവച്ചു.