കൊളംബോ: ആസ്‌ത്രേലിയക്കെതിരായ ആദ്യ ക്രിക്കറ്റ് ടെസ്റ്റില്‍ ശ്രീലങ്കയ്ക്ക് ബാറ്റിങ് തകര്‍ച്ച. ടോസ് നേടി ആദ്യം ബാറ്റ് ചെയ്ത ലങ്ക 117 റണ്‍സിന് കൂടാരം കയറി. മറുപടി ബാറ്റിങില്‍ ആദ്യ ദിനം അവസാനിച്ചപ്പോള്‍ ആസ്‌ത്രേലിയ രണ്ടു വിക്കറ്റ് നഷ്ടത്തില്‍ 66 റണ്‍സെടുത്തിട്ടുണ്ട്. ലങ്കയുടെ ഒന്നാമിന്നിങ്‌സ് സ്‌കോറിനടുത്തെത്താന്‍ കങ്കാരുക്കള്‍ക്ക് ഇനിയും 51 റണ്‍സ് ആവശ്യമാണ്. ഉസ്മാന്‍ ഖവാജ(25*) സ്റ്റീവന്‍ സ്മിത്ത്(28*) എന്നിവരാണ് ക്രീസില്‍. ജോ ബേണ്‍സ്(3) ഡേവിഡ് വാര്‍ണര്‍(0) എന്നിവരാണ് പുറത്തായ താരങ്ങള്‍.
അതേസമയം ആദ്യം ബാറ്റ് ചെയ്യാന്‍ അവസരം ലഭിച്ച  ലങ്കയുടെ ഒരു താരങ്ങള്‍ക്കും 25 റണ്‍സിന് മുകളില്‍ സ്‌കോര്‍ ചെയ്യാന്‍ സാധിച്ചില്ല. ധനഞ്ജയ ഡി സില്‍വ(24) ആണ് ടീമിന്റെ ടോപ് സ്‌കോറര്‍. ദിനേഷ് ചാന്‍ഡിമല്‍(15) ആഞ്ചലോ മാത്യൂസ്(15) കുശാല്‍ പെരേര(20) എന്നിവര്‍ നന്നായി തുടങ്ങിയെങ്കിലും ആസ്‌ത്രേലിയന്‍ ബൗളിങിന് മുന്നില്‍ പിടിച്ചു നില്‍ക്കാനായില്ല. ആസ്‌ത്രേലിയക്കായി ജോഷ് ഹാസെല്‍വുഡ്, നഥാന്‍ ലിയോണ്‍ മൂന്നു വിക്കറ്റ് വീഴ്ത്തി. മിച്ചല്‍ സ്റ്റാര്‍ക്, സ്റ്റീവ് ഒക്കീഫ് എന്നിവര്‍ രണ്ടു വിക്കറ്റ് വീഴ്ത്തി.