ഇരിക്കൂര്‍: കര്‍ണാടകയില്‍ നിന്ന് തൃച്ഛംബരം ക്ഷേത്രത്തിലേക്ക് വന്ന തീര്‍ഥാടക സംഘം സഞ്ചരിച്ച വാന്‍ ഇരിക്കൂറില്‍ കടയിലേക്ക് പാഞ്ഞുകയറി. സ്ത്രീകളും കുട്ടികളുമടക്കം എട്ടോളം യാത്രക്കാരുണ്ടായിരുന്നു. പരുക്കേറ്റവരെ സ്വകാര്യ ആശുപത്രിയിലെത്തിച്ചു.
ഇന്നലെ രാവിലെ ഏഴോടെയാണ് ഇരിക്കൂര്‍ ടൗണിലെ യൂനിറ്റി ഹോസ്പിറ്റലിനു മുന്‍ഭാഗത്തുള്ള മൂന്ന് കടകളിലേക്ക് നിയന്ത്രണം വിട്ട് വാന്‍ പാഞ്ഞുകയറിയത്. പെട്രോള്‍ ലീക്കായത് പരിഭ്രാന്തി പരത്തിയെങ്കിലും നാട്ടുകാര്‍ രക്ഷാപ്രവര്‍ത്തനത്തിന് മുന്‍കൈയെടുത്തത് വന്‍ ദുരന്തം ഒഴിവാക്കി.
ലിവ ഫാഷന്‍ ഡിസൈനിങ് സെന്റര്‍, എല്‍.കെ.ജി സൈക്കിള്‍ മാര്‍ട്ട്, എ വണ്‍ ബേക്കറി എന്നീ കടകളിലേക്കാണ് വാഹനം പാഞ്ഞുകയറിയത്. ഡിസൈനിങ് സെന്ററിന്റെ മുന്‍ഭാഗം പൂര്‍ണമായും മറ്റുള്ളവയുടേത് ഭാഗികമായും തകര്‍ന്നു. ഇരിക്കൂര്‍ പൊലിസ് എത്തി ക്രെയിന്‍ വരുത്തിയാണ് വാന്‍ മാറ്റിയത്. മൂന്ന് കടകള്‍ക്കും കൂടി രണ്ടു ലക്ഷം രൂപയുടെ നഷ്ടം കണക്കാക്കുന്നു.