ഷിജിത്ത് കാട്ടൂര്‍ 

കാസര്‍കോട്: അനര്‍ഹമായ രീതിയില്‍ മുന്‍ഗണനാപ്പട്ടികയില്‍ ഇടംപിടിച്ച 70,000 കുടുംബങ്ങള്‍ മാസങ്ങളായി ഭക്ഷ്യധാന്യങ്ങള്‍ വാങ്ങുന്നില്ലെന്ന് കണ്ടെണ്ടത്തല്‍.
ഫീല്‍ഡ്തല പരിശോധന നടത്തിയാണ് മൂന്നുമാസമായി റേഷന്‍ സാധനങ്ങള്‍ വാങ്ങാത്തവരുടെ പട്ടിക ഭക്ഷ്യവകുപ്പ് തയാറാക്കിയത്.
തദ്ദേശസ്വയംഭരണ, മോട്ടോര്‍വാഹന വകുപ്പുകളുടെ ഡാറ്റയുമായി ആര്‍.സി.എം.എസ് ഡാറ്റാ മാപ്പിങ് നടത്തിയാണ് അനര്‍ഹരായ കുടുംബങ്ങളെ കണ്ടെണ്ടത്തിയത്. ആശ്രയ പദ്ധതിയില്‍പ്പെട്ടവരുടെ പട്ടിക കുടുംബശ്രീയില്‍നിന്ന് ലഭ്യമാക്കാനും നടപടി സ്വീകരിച്ചിട്ടുണ്ട്. മരിച്ചവരുടെ വിവരങ്ങള്‍ തദ്ദേശസ്വയംഭരണ വകുപ്പുകളുടെ സഹകരണത്തോടെയും ശേഖരിക്കും. തുടര്‍ന്ന് ഇവരെ പട്ടികയില്‍നിന്ന് ഒഴിവാക്കും.
അതേസമയം, വസ്തുതകള്‍ മറച്ചുവച്ച് മുന്‍ഗണനാപട്ടികയില്‍ കടന്നുകൂടിയ അനര്‍ഹര്‍ക്കെതിരേ നിയമനടപടി സ്വീകരിക്കുന്നതോടൊപ്പം ഈ കാലയളവില്‍ വാങ്ങിയ റേഷന്‍ സാധനങ്ങളുടെ കമ്പോള വിലയും ഈടാക്കും.
മുന്‍ഗണനാ കാര്‍ഡുകള്‍ കരസ്ഥമാക്കിയ ചില കാര്‍ഡുടമകള്‍ സ്വമേധയാ കാര്‍ഡുകള്‍ തിരിച്ചേല്‍പ്പിച്ചിരുന്നു. ഇതിനുപുറമെ മാനദണ്ഡങ്ങള്‍ക്ക് വിരുദ്ധമായി നേടിയ റേഷന്‍കാര്‍ഡുകള്‍ അന്വേഷണത്തിലൂടെ മുന്‍ഗണനേതര വിഭാഗത്തിലേക്ക് മാറ്റിയിട്ടുമുണ്ട്. പരിശോധനയും നടപടിക്രമങ്ങളും പൂര്‍ത്തിയാകുന്നതോടെ മുന്‍ഗണനാപ്പട്ടികയില്‍ അര്‍ഹരായവരെ മാത്രം ഉള്‍പ്പെടുത്താനും പരാതി പൂര്‍ണമായും ഇല്ലാതാക്കാനും കഴിയുമെന്നാണ് ഭക്ഷ്യവകുപ്പിന്റെ പ്രതീക്ഷ.