തിരൂരങ്ങാടി: നടുറോഡില്‍ പൊലിസുകാരനെ കയ്യേറ്റം ചെയ്ത ബസ് ഡ്രൈവറെ അറസ്റ്റ് ചെയ്തു. സ്വകാര്യ ബസ് ഡ്രൈവര്‍ കരിപ്പൂര്‍ പുളിയംപറമ്പ് കണ്ടംപള്ളി മുബശിര്‍(24)നെയാണ് തിരൂരങ്ങാടി പൊലിസ് അറസ്റ്റ് ചെയ്തത്. ഇന്നലെ രാവിലെ 9മണിക്ക് ചെമ്മാട് ടൗണിലാണ് സംഭവം. ബസ് നടുറോഡില്‍നിര്‍ത്തി ഇയാള്‍ മനഃപൂര്‍വ്വം ടൗണില്‍ ഗതാഗതക്കുരുക്ക് സൃഷ്ടിക്കുകയായിരുന്നുവെന്നാണ് വിവരം. പ്രശ്‌നം പരിഹരിക്കാന്‍ എത്തിയ തിരൂരങ്ങാടി സ്റ്റേഷനിലെ ശിവന്‍ എന്ന പൊലിസുകാരന്‍ ഇയാളോട് പുറത്തിറങ്ങാന്‍ ആവശ്യപ്പെട്ടു.എന്നാല്‍ ഇതിന് വഴങ്ങാതിരുന്ന ഇയാളെ ബലമായി പിടിച്ചിറക്കുന്നതിനിടെ ജനമധ്യത്തില്‍വെച്ച് ഇദ്ദേഹത്തെ കൈയേറ്റം ചെയ്യുകയായിരുന്നു എന്ന് പൊലിസ് പറഞ്ഞു. ശിവന് നേരിയ പരുക്കുണ്ട്.