ന്യൂഡല്‍ഹി: ഡല്‍ഹി ചീഫ് സെക്രട്ടറി അന്‍ഷു പ്രകാശിനെ കൈയേറ്റം ചെയ്‌തെന്ന പരാതിയില്‍ ഡല്‍ഹി മുഖ്യമന്ത്രി അരവിന്ദ് കെജ്‌രിവാള്‍, ഉപമുഖ്യമന്ത്രി മനീഷ് സിസോദിയ ഉള്‍പ്പെടെ എ.എ.പിയുടെ 13 നേതാക്കളെ കോടതി വിളിപ്പിച്ചു. അടുത്തമാസം 25നുള്ളില്‍ നേരിട്ട് ഹാജരാവണമെന്നാണ് പട്യാല ഹൗസ് കോടതി പുറപ്പെടുവിച്ച സമന്‍സില്‍ പറയുന്നത്. കെജ്‌രിവാളിനെയും സിസോദിയയെയും കൂടാതെ അമാനത്തുല്ലാ ഖാന്‍, ജര്‍വാള്‍, നിതിന്‍ ത്യാഗി, റിതുരാജ് ഗോവിന്ദ്, സഞ്ജീവ് ഝാ, അജയ് ദത്ത്, രാജേഷ് റിഷി, രാജേഷ് ഗുപ്ത, മദന്‍ ലാല്‍, പ്രവണ്‍കുമാര്‍, ദിനേഷ് സൊഹാനിയ എന്നിവരാണ് ഹാജരാവേണ്ടത്.
ഡല്‍ഹി ഭരിക്കുന്ന എ.എ.പി സര്‍ക്കാരും കേന്ദ്രത്തിലെ ബി.ജെ.പി സര്‍ക്കാരും തമ്മില്‍ നിരന്തരം ഏറ്റുമുട്ടുന്നതിനിടെ ഈ വര്‍ഷം ഫെബ്രുവരി 19നാണ് കേസിനാസ്പദമായ സംഭവം. അന്ന് രാത്രി കെജ്‌രിവാളിന്റെ വസതിയില്‍ വിളിച്ച പ്രത്യേക യോഗത്തില്‍ കൈയേറ്റം നടന്നുവെന്നാണ് പരാതി. മെയിലാണ് കേസില്‍ കുറ്റപത്രം സമര്‍പ്പിച്ചത്. മുഖ്യമന്ത്രിയും ഉപമുഖ്യമന്ത്രിയും എം.എല്‍.എമാരും ഉള്‍പ്പെടെയുള്ളവര്‍ ചീഫ് സെക്രട്ടറിയെ കൈയേറ്റം ചെയ്യുകയും ഭീഷണിപ്പെടുത്തിയെന്നുമാണ് 3,000 പേജ് വരുന്ന കുറ്റപത്രത്തില്‍ പറയുന്നത്.