ന്യൂഡല്‍ഹി: ഫ്രാന്‍സുമായി റാഫേല്‍ യുദ്ധവിമാനങ്ങള്‍ വാങ്ങാനുള്ള ഇടപാടില്‍ അഴിമതി ആരോപിച്ച് പ്രധാനമന്ത്രി നരേന്ദ്ര മോദി ഉള്‍പ്പെടെയുള്ളവരെ എതിര്‍കക്ഷിയാക്കി നല്‍കിയ കേസ് പരിഗണിക്കുന്നത് സുപ്രിംകോടതി നീട്ടി. അടുത്തമാസം 10 വരെയാണു നീട്ടിവച്ചത്.
അഴിമതി നടന്നതിനാല്‍ ഫ്രാന്‍സുമായുള്ള കരാര്‍ സ്റ്റേ ചെയ്യണമെന്ന് ആവശ്യപ്പെട്ട് അഭിഭാഷകനായ എം.എല്‍ ശര്‍മ നല്‍കിയ ഹരജിയാണ് സുപ്രിംകോടതി മുന്‍പാകെയുള്ളത്. ഹരജിയിലെ ഒന്നാം എതിര്‍കക്ഷി പ്രധാനമന്ത്രിയും രണ്ടാം എതിര്‍കക്ഷി മുന്‍ പ്രതിരോധ മന്ത്രി മനോഹര്‍ പരീക്കറും മൂന്നാം എതിര്‍കക്ഷി റിലയന്‍സ് മേധാവി അനില്‍ അംബാനിയും ആറാം എതിര്‍കക്ഷി സി.ബി.ഐയുമാണ്.
ജഡ്ജിമാരായ രഞ്ജന്‍ ഗോഗോയ്, നവീന്‍ സിന്‍ഹ, കെ.എം ജോസഫ് എന്നിവരടങ്ങുന്ന ബെഞ്ചിനുമുന്‍പാകെയാണു ഹരജി എത്തിയത്. കൂടുതല്‍ രേഖകള്‍ ഹാജരാക്കാനുണ്ടെന്നും അതിനാല്‍ ഹരജി പരിഗണിക്കുന്നത് മാറ്റിവയ്ക്കമെന്നുള്ള എം.എല്‍ ശര്‍മയുടെ ആവശ്യം അംഗീകരിച്ചാണ് കോടതി നടപടി.