ഇസ്‌ലാമാബാദ്: പാക് സൈന്യത്തിന്റെ വിമര്‍ശകനായ മാധ്യമപ്രവര്‍ത്തകനെ അജ്ഞാതന്‍ കൊലപ്പെടുത്തി. ആക്ടിവിസ്റ്റും ബ്ലോഗറുമായ മുഹമ്മദ് ബിലാല്‍ ഖാന്‍(22) ആണ് കഴിഞ്ഞ ദിവസം രാത്രി കൊല്ലപ്പെട്ടത്. ട്വിറ്ററില്‍ 16,000 പേരും ഫേസ്ബുക്കില്‍ 22,000 പേരും ഇദ്ദേഹത്തെ പിന്തുടരുന്നുണ്ട്.
ഞാറാഴ്ച രാത്രിയില്‍ ലഭിച്ച ഫോണ്‍ കോളിനെ തുടര്‍ന്ന് ഇസ്‌ലമാബാദിലെ ജി-9 എന്ന സ്ഥലത്തെത്തിയ ഇദ്ദേഹത്തെ കൊലപ്പെടുത്തുകയായിരുന്നു.
കഠാര ഉപയോഗിച്ചാണ് മാധ്യമപ്രവര്‍ത്തകനെ കൊലപ്പെടുത്തിയതെന്ന് പൊലിസ് സുപ്രണ്ട് സദ്ദാന്‍ മാലിക് നഈം പറഞ്ഞു. പ്രദേശത്ത് നിന്ന് വെടിയൊച്ച കേട്ടെന്ന് സമീപവാസികള്‍ പറഞ്ഞു.
ഇദ്ദേഹത്തിന്റെ സുഹൃത്തിനും ആക്രമണത്തില്‍ പരുക്കേറ്റിട്ടുണ്ട്. ആക്രമണത്തിന് പിന്നില്‍ ആരാണെന്ന് കാര്യം വ്യക്തമായിട്ടില്ല.
ബിലാല്‍ ഖാന്റെ കൊലപാതകത്തിന് പിന്നില്‍ സൈന്യവും രഹസ്യന്വേഷണ വിഭാഗമായ ഐ.എസ്.ഐയുമാണെന്ന് നിരവധി പേര്‍ ആരോപിച്ചു.
കൊലപാതകത്തിന് പിന്നില്‍ പ്രവര്‍ത്തിച്ചവരെ കണ്ടെത്തണമെന്ന് ആവശ്യപ്പെട്ട് ജസ്റ്റിസ് മുഹമ്മദ് ബിലാല്‍ ഖാന്‍ എന്ന ഹാഷ് ടാഗോടെ പാകിസ്താനിലെ സാമൂഹിക മാധ്യമങ്ങളില്‍ പ്രചാരണവുമായി നിരവധി ആക്ടിവിസ്റ്റുകള്‍ രംഗത്തെത്തിയിട്ടുണ്ട്.