കൊല്ലം: പണം പോകുന്ന കേസാണോ, ജീവനക്കാര്‍ രാഷ്ട്രീയ യൂനിയന്‍ വ്യത്യാസമില്ലാതെ ഒറ്റക്കെട്ടാകും. ജീവനക്കാര്‍ വിസമ്മതപത്രം നല്‍കിയില്ലെങ്കില്‍ പ്രളയദുരിതം മറികടക്കാന്‍ ഒരു മാസത്തെ ശമ്പളം പിടിക്കുമെന്ന് സര്‍ക്കാര്‍ പ്രഖ്യാപിച്ചിരുന്നു. ഇതിനെ തുടര്‍ന്നാണ് കെ.എസ്.ആര്‍.ടി.സി ജീവനക്കാര്‍ സംസ്ഥാനത്ത് എല്ലാ ഡിപ്പോകളിലും യൂനിയന്‍ വ്യത്യാസമില്ലാതെ കൂട്ട വിസമ്മതപത്രം നല്‍കുന്നത്.

സര്‍ക്കാരിന്റെ തൊഴിലാളി വിരുദ്ധ നടപടികളില്‍ പ്രതിഷേധിച്ചാണ് തീരുമാനമെന്ന് ഭരണ അനുകൂല സംഘടനകള്‍ ചൂണ്ടിക്കാട്ടുന്നു. 22 വരെ വിസമ്മതപത്രം നല്‍കാന്‍ സമയമുണ്ടെങ്കിലും എല്ലാ ജീവനക്കാരും അതിനു മുന്‍പുതന്നെ വിസമ്മതപത്രം സമര്‍പ്പിക്കുന്നതിനുള്ള തിരക്കിലാണ്.
ഷെഡ്യൂള്‍ വെട്ടിക്കുറയ്ക്കുന്നതിന്റെ ഭാഗമായി ആയിരം കണ്ടക്ടര്‍മാരെയും ഡ്രൈവര്‍മാരെയും കുറയ്ക്കാന്‍ മാനേജ്‌മെന്റ് തീരുമാനിച്ചിരുന്നു. അതനുസരിച്ച് കണ്ടക്ടര്‍മാരും ഡ്രൈവര്‍മാരും സിംഗിള്‍ ഡ്യൂട്ടിമാത്രം ചെയ്താല്‍ മതിയെന്നാണ് തീരുമാനം.
ഡ്യൂട്ടിയുള്ള എട്ടുമണിക്കൂറില്‍ ആറര മണിക്കൂര്‍ ഡ്രൈവര്‍ സ്റ്റിയറിങിന് മുന്‍പില്‍ ഉണ്ടാകണം. ബാക്കി വരുന്ന ഒന്നര മണിക്കൂറാണ് സര്‍വിസ് ഏറ്റെടുക്കുന്നതിന്റെ നടപടിക്രമങ്ങളും വിശ്രമസമയവും. തിരക്കുള്ള സര്‍വിസുകളിലായാലും എട്ടുമണിക്കൂര്‍ മാത്രമാണ് ഡ്യൂട്ടിസമയം. ഇതോടെ സര്‍വിസുകള്‍ താളംതെറ്റുകയും യാത്രാദുരിതമേറുകയുമാണ്.
എന്നാല്‍, സര്‍ക്കാര്‍നയം നടപ്പാക്കുകയാണ് താന്‍ ചെയ്യുന്നതെന്ന എം.ഡിയുടെ വിശദീകരണത്തെ തുടര്‍ന്നുള്ള ജീവനക്കാരുടെ പ്രതിഷേധത്തിന്റെ ഭാഗമാണ് കൂട്ടവിസമ്മതപത്ര സമര്‍പ്പണം.