പാരിസ്: ജമൈക്കയെ 4-1 എന്ന സ്‌കോറിന് തകര്‍ത്ത് ആസ്‌ത്രേലിയ വനിതാ ലോകകപ്പ് ഫുട്‌ബോളിന്റെ പ്രീക്വാര്‍ട്ടറില്‍ പ്രവേശിച്ചു. ഗ്രൂപ്പ് ഘട്ടം കടക്കാന്‍ ജയം അനിവാര്യമായിരുന്ന ആസ്‌ത്രേലിയ സാം കെറിന്റെ കരുത്തിലാണ് ജയിച്ച് കയറിയത്. മത്സരത്തില്‍ സാം കെറ് നാലു ഗോളുകളാണ് സ്വന്തമാക്കിയത്.

ഹെഡറിലൂടെയായിരുന്നു കെറിന്റെ ആദ്യ രണ്ട് ഗോളുകളും പിറന്നത്. ഇതോടെ അമേരിക്കയുടെ അലക്‌സ് മോര്‍ഗനൊപ്പം അഞ്ചു ഗോളുകളുമായി ടൂര്‍ണമെന്റിലെ ടോപ് സ്‌കോറര്‍ സ്ഥാനത്തെത്താനും കെറിനായി. പ്രീ ക്വാര്‍ട്ടര്‍ നോര്‍വെയെയാണ് ആസ്‌ത്രേലിയ നേരിടുക. നൈജീരിയയെ തകര്‍ത്ത് ആതിഥേയരായ ഫ്രാന്‍സും ക്വാര്‍ട്ടറില്‍ പ്രവേശിച്ചു. ഇന്നലെ നടന്ന മറ്റൊരു മത്സരത്തില്‍ എതിരില്ലാത്ത ഒരു ഗോളിന് ബ്രസീല്‍ ഇറ്റലിയെ തകര്‍ത്തു. 74-ാം മിനുട്ടില്‍ പെനാല്‍റ്റിയിലൂടെ മാര്‍ത്തയാണ് ബ്രസീലിന്റെ ഗോള്‍ നേടിയത്. ഇറ്റലിയെ തകര്‍ത്തെങ്കിലും ഗ്രൂപ്പ് സിയില്‍ ബ്രസീല്‍ ആറു പോയിന്റുമായി മൂന്നാം സ്ഥാനത്താണുള്ളത്. ആറു പോയിന്റുമായി ഇറ്റലിയും ആറു പോയിന്റുമായി ആസ്‌ത്രേലിയയും ഒന്നും രണ്ടും സ്ഥാനത്ത് നില്‍ക്കുന്നു. ഇറ്റലി നേരത്തെ തന്നെ പ്രീ ക്വാര്‍ട്ടര്‍ ഉറപ്പിച്ചിരുന്നു. ഗ്രൂപ്പ് ബിയില്‍ നിന്ന് ജര്‍മനിയും സ്‌പെയിനും പ്രീ ക്വാര്‍ട്ടര്‍ ഉറപ്പിച്ചിട്ടുണ്ട്. ഇന്ന് രാത്രി 9.30ന് നടക്കുന്ന മത്സരത്തില്‍ കാമറൂണും ന്യൂസിലന്‍ഡും തമ്മില്‍ ഏറ്റുമുട്ടും. മറ്റൊരു മത്സരത്തില്‍ തുല്യ ശക്തികളായ അമേരിക്കയും സ്വീഡനും തമ്മിലാണ് മത്സരം. 12.30ന് നടക്കുന്ന മറ്റൊരു മത്സരത്തില്‍ ചിലി തായ്‌ലന്‍ഡിനെ നേരിടും.