ന്യൂഡല്‍ഹി: എന്‍.ഡി.എ സഖ്യ ജയിച്ചാല്‍ നിതീഷ് കുമാറിന് മുഖ്യമന്ത്രി സ്ഥാനം ലഭിക്കുമോ എന്നതാണ് ഇപ്പോള്‍ രാഷ്ട്രീയ നിരീക്ഷകര്‍ ഉറ്റു നോക്കുന്നത്. എന്നാല്‍ ഫലം പുറത്തു വരുമ്പോള്‍ ജെ.ഡിയുവിനേക്കാള്‍ ബഹുദൂരം മുന്നിലാണ് ബി.ജെ.പി.

മാത്രമല്ല, ഈ തെരഞ്ഞെടുപ്പിലുടനീളം പ്രതിഫലിച്ചത് മോദി പ്രഭാവമാണെന്ന അവകാശ വാദവും ഉന്നയിക്കുന്നുണ്ട് ബി.ജെ.പി.

'ഈ തെരഞ്ഞെടുപ്പിലുടനീളം പ്രതിഫലിച്ചത് മോദി പ്രഭാവമാണ്'- ബി.ജെ.പി മുതിര്‍ന്ന നേതാവ് കൈലാഷ് വാര്‍ഗിയ പറയുന്നു. വൈകുന്നേരത്തോടെ സര്‍ക്കാര്‍ രൂപീകരണത്തെ കുറിച്ചും നേതൃത്വത്തെ കുറിച്ചും ധാരണയിലെത്തുമെന്നും അദ്ദേഹം കൂട്ടിച്ചേര്‍ത്തു.

അതേസമയം, മുഖ്യമന്ത്രി സ്ഥാനത്തേക്ക് പുതിയ ആളെ പരിഗണിക്കുമോ എന്ന ചോദ്യത്തിന് നിതീഷ് കുമാറിന് നല്‍കി വാഗ്ദാനത്തില്‍ നിന്ന് മാറില്ലെന്നായിരുന്നു വാര്‍ഗിയയുടെ പ്രതികരണം. പ്രചാരണത്തിലുടനീളം നിതീഷ് കുമാറിനെ തന്നെയായിരുന്നു അമിത് ഷാ ഉള്‍പെടെ നേതാക്കള്‍ ഉയര്‍ത്തിക്കാട്ടിയിരുന്നത്.