കൊച്ചി: ഞങ്ങളുടെ പ്രാര്‍ഥന ദൈവം കേള്‍ക്കാതിരിക്കില്ല, തൃപ്പൂണിത്തുറയില്‍ എന്താണ് സംഭവിക്കുന്നതെന്ന് അറിയില്ല. സമരപ്പന്തലില്‍ നിന്ന് വിളിച്ചുപറയുന്നത് മാത്രമേ അറിയൂ. ഫ്രാങ്കോ രാവിലെ പതിനൊന്നോടെ ചോദ്യംചെയ്യലിന് ഹാജരായെന്ന് അങ്ങനെയാണ് അറിഞ്ഞത്- കന്യാസ്ത്രീകളുടെ സമരത്തിന് നേതൃത്വം നല്‍കുന്ന സിസ്റ്റര്‍ അനുപമ പറഞ്ഞു.
എത്രയുംപെട്ടെന്ന് ഞങ്ങളുടെ സഹോദരിക്ക് നീതികിട്ടണമെന്ന പ്രാര്‍ഥന മാത്രമേയുള്ളൂ. ആ പ്രാര്‍ഥനയില്‍ ഞങ്ങളുടെ ജീവന്‍ അപകടത്തിലാണെന്ന കാര്യംപോലും ഓര്‍ക്കാന്‍ കഴിയുന്നില്ല. കഴിഞ്ഞ 12 ദിവസമായി ഇവിടെ സമരം ചെയ്യുന്നു. നീതി ലഭിക്കുമെന്നാണ് വിശ്വാസം. പീഡനത്തിനിരയായ കന്യാസ്ത്രീ കടുത്ത മനോവിഷമത്തിലാണ്.
ഇനിയാര്‍ക്കും ഇങ്ങനെയൊരു അവസ്ഥയുണ്ടാകരുതെന്ന പ്രാര്‍ഥനയിലാണവര്‍. കുറുവിലങ്ങാട് മഠത്തില്‍ ഞങ്ങള്‍ ഒട്ടും സുരക്ഷിതരല്ല. ഭക്ഷണത്തില്‍ വിഷംനല്‍കി കൊല്ലുമോ എന്നുപോലും ഭയക്കുന്നു.
ഇതര സംസ്ഥാനങ്ങളില്‍ നിന്നുള്ളവരെയാണ് ഭക്ഷണം തയാറാക്കാന്‍ നിയോഗിച്ചിരിക്കുന്നത്. പീഡനത്തിനിരയായ കന്യാസ്ത്രീക്കെതിരേ നിറംപിടിപ്പിച്ച കഥകള്‍ പ്രചരിക്കുന്നുണ്ട്. എന്തുവന്നാലും നേരിടും. ഞങ്ങള്‍ക്കൊപ്പം വീട്ടുകാരുണ്ടെന്ന സമാധാനമാണിപ്പോള്‍. ബിഷപ്പിനെതിരായ മുഴുവന്‍ തെളിവുകളും അന്വേഷണ ഉദ്യോഗസ്ഥര്‍ക്ക് കൈമാറിയതാണ്. ബിഷപ്പിന്റെ ആള്‍ക്കാര്‍ സ്വാധീനിക്കാന്‍ ശ്രമിക്കുന്നുണ്ട്. ജാതിമത ഭേദമന്യേ സമരപ്പന്തലില്‍ ഒഴുകിയെത്തുന്നവരാണ് ഞങ്ങളുടെ കരുത്ത്. ബിഷപ്പ് ശിക്ഷിക്കപ്പെടുമെന്നാണ് പ്രതീക്ഷയെന്നും സിസ്റ്റര്‍ അനുപമ പറഞ്ഞു. അതിനിടെ, ബിഷപ്പിനെ അറസ്റ്റ് ചെയ്യണമെന്നാവശ്യപ്പെട്ട് സേവ് അവര്‍ സിസ്റ്റേഴ്‌സ് ആക്ഷന്‍ കൗണ്‍സിലിന്റെ നേതൃത്വത്തില്‍ എറണാകുളം ഐ.ജി ഓഫിസിലേക്ക് മാര്‍ച്ച് നടത്തി. മാര്‍ച്ച് നടനും സംവിധായകനുമായ ജോയ് മാത്യു ഉദ്ഘാടനം ചെയ്തു. സി.ആര്‍ നീലകണ്ഠന്‍, ഫാ. അഗസ്റ്റിന്‍ വട്ടോളി, അഡ്വ. ഭദ്ര എന്നിവര്‍ നേതൃത്വം നല്‍കി.