റോം: ഇറ്റാലിയന്‍ ലീഗ് മത്സരത്തിനിടെ എതിര്‍ താരത്തിന്റെ മുഖത്ത് തുപ്പിയതിന് യുവന്റസ് താരം ഡഗ്ലസ് കോസ്റ്റക്ക് നാലു മത്സരങ്ങളില്‍ നിന്നു വിലക്ക്. സസുവോള താരം ഡി ഫ്രാന്‍സിസ്‌കോയുടെ മുഖത്താണ് കോസ്റ്റ തുപ്പിയത്. ഇറ്റാലിയന്‍ ലീഗിലെ നാലു മത്സരങ്ങളില്‍ നിന്നാണു കോസ്റ്റയെ വിലക്കിയിട്ടുള്ളത്.
യുവന്റസിന്റെ അടുത്ത ലീഗ് മത്സരങ്ങളായ ഫ്രോസിനോന്‍, ബോള്‍ഗോന, നാപോളി, ഉഡിനെസെ എന്നീ ടീമുകള്‍ക്കെതിരേയുള്ള മത്സരങ്ങളില്‍ കോസ്റ്റക്ക് പുറത്തിരിക്കേണ്ടി വരും.
റഫറിയുടെ റിപ്പോര്‍ട്ടിന്റെ അടിസ്ഥാനത്തിലാണ് കോസ്റ്റക്കെതിരേയുള്ള നടപടി നാലു മത്സരങ്ങളില്‍ മാത്രമായി ചുരുങ്ങിയത്. മോശം പ്രകടനം നടത്തിയതിന് യുവന്റസും താരത്തിനെതിരേ നടപടിയെടുക്കുമെന്നറിയിച്ചിട്ടുണ്ട്.