ദുബൈ: ഏഷ്യാകപ്പ് ക്രിക്കറ്റിലെ രണ്ടാം മത്സരത്തില്‍ പാകിസ്താനെ തകര്‍ത്ത് ഇന്ത്യ. എട്ടു വിക്കറ്റിനാണ് ഇന്ത്യ പാകിസ്താനെ തകര്‍ത്തത്. ആദ്യ മത്സരത്തില്‍ ഹോങ്കോങ്ങിനോട് വിറച്ച് ജയിച്ച ഇന്ത്യയല്ലായിരുന്നു പാകിസ്താനെതിരേയുള്ള മത്സരത്തില്‍. ബൗളിങ്ങിലും ബാറ്റിങ്ങിലും ഫീല്‍ഡിങ്ങിലും ഇന്ത്യന്‍നിര മികച്ച് നിന്നു. ഇന്ത്യന്‍ ബൗളര്‍മാര്‍ക്ക് മുന്നില്‍ പാകിസ്താന്‍ ബാറ്റിങ് നിര മുട്ടുമടക്കി. കേധാര്‍ യാഥവിനും ഭുവനേശ്വര്‍ കുമാറിനൊപ്പം ഇന്ത്യന്‍ ഫീല്‍ഡര്‍മാരും ഒത്തുപിടിച്ചപ്പോള്‍ പാകിസ്താന്‍ 162 റണ്‍സിനു ഓള്‍ഔട്ട് ആവുകയായിരുന്നു. മറുപടി ബാറ്റിങ്ങിനങ്ങിയ ഇന്ത്യ 29 ഓവറില്‍ 164 റണ്‍സെടുത്താണ് വിജയിച്ചത്.
43.1 ഓവറുകള്‍ക്കുള്ളില്‍ പാകിസ്താനെ ഓള്‍ഔട്ട് ആക്കി ഇന്ത്യ തങ്ങളുടെ ആദ്യ മത്സരത്തിലെ നിറം മങ്ങിയ പ്രകടനത്തിന് പ്രായശ്ചിത്തം ചെയ്തു. ഓപ്പണര്‍മാരായ ഇമാംഉള്‍ഹക്കിനെയും ഫകര്‍ സമാനെയും തുടക്കത്തില്‍ തന്നെ ഭുവനേശ്വര്‍ കുമാര്‍ പുറത്താക്കിയ ശേഷം ബാബര്‍ അസം ഷൊയ്ബ് മാലിക്ക് കൂട്ടുകെട്ട് പാകിസ്താനായി രക്ഷാപ്രവര്‍ത്തനങ്ങള്‍ ആരംഭിച്ചുവെങ്കിലും 47 റണ്‍സ് നേടിയ ബാബര്‍ അസമിനെ കുല്‍ദീപ് യാദവ് പവലിയനിലേക്ക് തിരികെ അയച്ചു. ഷൊയ്ബ് മാലിക്ക്(43) റണ്ണൗട്ടായി പുറത്തായതോടെ പാകിസ്താനു കാര്യങ്ങള്‍ കൂടുതല്‍ ശ്രമകരമായി. സര്‍ഫ്രാസ് അഹമ്മദിനെയും ആസിഫ് അലിയെയും കേധാര്‍ ജാഥവും പുറത്താക്കി.
എട്ടാം വിക്കറ്റില്‍ 37 റണ്‍സ് നേടിയ ഫഹീം അഷ്‌റഫ് -മുഹമ്മദ് അമീര്‍ കൂട്ടുകെട്ടാണ് പാകിസ്താനെ 150 കടക്കുവാന്‍ സഹായിച്ചത്. 21 റണ്‍സ് നേടിയ ഫഹീം അഷ്‌റഫിനെ ധവാന്റെ കൈകളിലെത്തിച്ച് ജസ്പ്രീത് ബുംറ മത്സരത്തിലെ തന്റെ ആദ്യ വിക്കറ്റ് നേടി. ഓപ്പണര്‍മാരെ പുറത്താക്കിയ ഭുവനേശ്വര്‍ വാലറ്റത്തില്‍ ഹസന്‍ അലിയെയും പുറത്താക്കി. ഇന്ത്യയ്ക്കായി ഭുവനേശ്വര്‍ കുമാറും കേധാര്‍ ജാഥവും മൂന്ന് വീതം വിക്കറ്റ് നേടിയപ്പോള്‍ ജസ്പ്രീത് ബുംറ രണ്ടണ്ടും കുല്‍ദീപ് ഒരു വിക്കറ്റും നേടി. മറുപടി ബാറ്റിങ്ങിനിറങ്ങിയ ഇന്ത്യ അനായാസമാണ് ജയം കൈക്കലാക്കിയത്. ഓപ്പണര്‍മാരായി ഇറങ്ങിയ രോഹിത് ശര്‍മയും ശിഖര്‍ ധവാനും മികച്ച തുടക്കമാണ് നല്‍കിയത്. 52 റണ്‍സുമായി രോഹിത് പുറത്തായപ്പോള്‍ ഇന്ത്യ ജയത്തിനടുത്തായിരുന്നു. ശഹാബ് ഖാന്റെ പന്തില്‍ ബൗള്‍ഡായാണ് രോഹിത് പുറത്തായത്.
തുടര്‍ന്ന് 46 റണ്‍സുമായി ധവാനും പുറത്തായി. ഫഹീം അഷ്‌റഫിന്റെ പന്തില്‍ ബാബര്‍ അസാമിന് ക്യാച്ച് നല്‍കിയാണ് ധവാന്‍ ക്രീസ് വിട്ടത്. പിന്നീടെത്തിയ അമ്പാട്ടി റായിഡുവും ദിനേശ് കാര്‍ത്തിക്കും ചേര്‍ന്നാണ് ഇന്ത്യന്‍ കപ്പല്‍ വിജയതീരത്തണച്ചത്.