ജിദ്ദ: മുന്‍ മുഖ്യമന്ത്രി ഉമ്മന്‍ചാണ്ടിയും മുന്‍ പ്രവാസികാര്യ മന്ത്രി കെ.സി ജോസഫും മൂന്നു ദിവസത്തെ സഊദി സന്ദര്‍ശനത്തിനായി റിയാദിലെത്തി. പുലര്‍ച്ചെ റിയാദ് കിങ് ഖാലിദ് രാജ്യാന്തര വിമാനത്താവളത്തിലെത്തിയ ഇരുവരെയും ഒ.ഐ.സിസിയുടെ നേതൃത്വത്തില്‍ കോണ്‍ഗ്രസ്സ് പ്രവര്‍ത്തകര്‍ സ്വീകരിച്ചു.

പ്രോഗ്രാം ജനറല്‍ കണ്‍വീനര്‍ ഷാജി കുന്നികോട്, കണ്‍വീനര്‍ ഇസ്മാഈല്‍ എരുമേലി. ഗ്ലോബല്‍ നേതാക്കളായ മജീദ് ചിങ്ങോലി, റസാഖ് പൂക്കോട്ടുംപാടം, അബ്ദുല്ല വല്ലാഞ്ചിറ, ഷാജി സോണ, സലീം കളക്കര തുടങ്ങിയ നിരവധി പേരാണ് ഉമ്മന്‍ചാണ്ടിയെ സ്വീകരിക്കാന്‍ എത്തിയത്. തിരക്കിട്ട പരിപാടികളാണ് ഉമ്മന്‍ചാണ്ടിക്കും കെ. സി. ജോസഫിനും റിയാദിലുള്ളത്.

പൊതുമാപ്പുമായി ബന്ധപ്പെട്ട് റിയാദിലെ വിവിധ തിരിച്ചയയ്ക്കല്‍ കേന്ദ്രങ്ങളിലും റിയാദ് ഇന്ത്യന്‍ എംബസ്സിയിലും സന്ദര്‍ശനം നടത്തും. തുടര്‍ന്ന് കെ.എം.സി.സി ഓഫിസിലും സന്ദര്‍ശനം നടത്തും. വിവിധ ലേബര്‍ ക്യാംപുകളിലും സന്ദര്‍ശനം നടത്തിയ ശേഷം റിയാദ് ഒ.ഐ.സി.സി ഒരുക്കുന്ന സ്വീകരണത്തിലും പങ്കെടുക്കും. രാത്രിയോടെ ഉമ്മന്‍ചാണ്ടിയും കെ.സി ജോസഫും ദമാമിലേക്ക് പോകും. തുടര്‍ന്ന് ജിദ്ദയിലെ സ്വീകരണത്തിലും പങ്കെടുക്കും.