കൊച്ചി: വന്ദേഭാരത് ഉൾപ്പെടെയുള്ള ട്രെയിനുകളിൽ പഴകിയ ഭക്ഷണം വിതരണം ചെയ്ത സംഭവത്തിൽ കർശന നടപടിയുമായി റെയിൽവേ. എറണാകുളം കടവന്ത്രയിൽ പ്രവർത്തിച്ച ബൃന്ദാവൻ ഫുഡ് പ്രൊഡക്ട്‌സിന് റെയിൽവേ ഒരു ലക്ഷം രൂപ പിഴ ചുമത്തി. സംഭവത്തെക്കുറിച്ച് അന്വേഷിക്കാൻ റെയിൽവേ ഉന്നതതല സമിതിയും രൂപവത്കരിച്ചു.

കോർപ്പറേഷൻ ലൈസൻസ് ഇല്ലാതെ പ്രവർത്തിച്ചിരുന്ന ഈ സ്ഥാപനത്തിൽ നടത്തിയ പരിശോധനയിൽ അഴുകിയ ഇറച്ചി, ചീഞ്ഞ മുട്ട എന്നിവയടക്കം വൃത്തിഹീനമായ ഭക്ഷ്യവസ്തുക്കൾ കണ്ടെടുത്തു. കാലാവധി കഴിഞ്ഞ മാംസവും പരിശോധനയിൽ പിടികൂടി. സ്ഥാപനം അടച്ചുപൂട്ടി സീൽ ചെയ്യാനാണ് നിലവിലെ തീരുമാനം.

നേരത്തെ, മാലിന്യം സമീപത്തെ തോട്ടിലേക്ക് ഒഴുക്കുന്നുവെന്ന് ആരോപിച്ച് സമീപവാസികൾ പരാതി ഉന്നയിച്ചിരുന്നു. അന്ന് കോർപ്പറേഷൻ പിഴ ചുമത്തുകയും ലൈസൻസ് എടുക്കാൻ രണ്ടുതവണ നോട്ടീസ് നൽകുകയും ചെയ്തിരുന്നു. എന്നാൽ, സ്ഥാപനം ഇതുവരെ ലൈസൻസ് നേടിയിട്ടില്ല. ഒരു വർഷത്തിൽ താഴെ മാത്രം പ്രവർത്തന വ്യാപ്തിയുള്ള ഈ സ്ഥാപനത്തിന്റെ ഉടമസ്ഥത സംബന്ധിച്ച് കോർപ്പറേഷന് വ്യക്തമായ വിവരമില്ല.

രൂക്ഷമായ ഗന്ധത്തെ തുടർന്ന് വീണ്ടും പരാതി ഉയർന്നതോടെ കോർപ്പറേഷൻ ആരോഗ്യവിഭാഗം നടത്തിയ പരിശോധനയിലാണ് പഴകിയ ഭക്ഷണം കണ്ടെത്തിയത്. ഇവിടെ ജോലി ചെയ്തിരുന്നവരിൽ ഭൂരിഭാഗവും ഇതരസംസ്ഥാന തൊഴിലാളികളായിരുന്നു. വന്ദേഭാരത് ഉൾപ്പെടെയുള്ള ട്രെയിനുകളിൽ വിതരണം ചെയ്യുന്ന ഭക്ഷണ പാക്കറ്റുകളും ഇവിടെനിന്ന് കണ്ടെടുത്തു. എന്നാൽ, റെയിൽവേ അധികൃതർ ഇതുസംബന്ധിച്ച് വിശദീകരണം നൽകിയിട്ടില്ല.

Railways imposed a ₹1 lakh fine on Brindavan Food Products, a catering unit in Kochi, for supplying stale food, including rotten meat and eggs, to trains like Vande Bharat. The unlicensed facility was sealed after inspections revealed unhygienic conditions. A high-level committee has been formed to investigate further.