ആലപ്പുഴ: ചേർത്തല തണ്ണീർമുക്കം കട്ടച്ചിറയിൽ തെരുവുനായയുടെ ആക്രമണത്തിൽ ആറ് പേർക്ക് പരിക്കേറ്റു. ഇന്ന് ഉച്ചയ്ക്ക് നടന്ന സംഭവത്തിൽ രണ്ട് പേർക്ക് മുഖത്ത് ഗുരുതര പരിക്കുണ്ട്. പരിക്കേറ്റവർ കോട്ടയം, ആലപ്പുഴ, ചേർത്തല എന്നിവിടങ്ങളിലെ ആശുപത്രികളിൽ ചികിത്സയിലാണ്. ആക്രമണം നടത്തിയ നായയെ നാട്ടുകാർ പിന്നീട് തല്ലിക്കൊന്നു.

കട്ടച്ചിറ സ്വദേശികളായ അനന്ദവല്ലി (71), രാധാകൃഷ്ണൻ (58), സദാനന്ദൻ (70), അർജുനൻ (59), ലളിത, ഉഷ എന്നിവരാണ് ആക്രമണത്തിനിരയായത്. സദാനന്ദന്റെ കണ്ണിന് പരിക്കേറ്റപ്പോൾ, ഓടുന്നതിനിടെ വീണ ഉഷയുടെ കൈ ഒടിഞ്ഞു. മുഖത്ത് പരിക്കേറ്റ രണ്ട് പേർ വണ്ടാനം മെഡിക്കൽ കോളജിൽ ചികിത്സയിലാണ്.

ആലപ്പുഴ ജില്ലയിൽ തുടർച്ചയായ രണ്ടാം ദിവസമാണ് തെരുവുനായ ആക്രമണം റിപ്പോർട്ട് ചെയ്യപ്പെടുന്നത്. ചൊവ്വാഴ്ച ചെറുതനയിൽ തെരുവുനായ ആറ് പേരെ കടിച്ചിരുന്നു. രാമങ്കരിയിൽ മുൻ പഞ്ചായത്ത് അംഗം ആനിയമ്മ സ്കറിയയുടെ കൈവിരലിന്റെ ഭാഗം നായ കടിച്ചെടുത്തു. തിങ്കളാഴ്ച രാത്രി പുന്നൂർ പറമ്പിൽ നാസിമയുടെ മകൾ അൻസിറ (12)നാണ് ആദ്യം കടിയേറ്റത്. വീട്ടിലെ നായയ്ക്ക് ഭക്ഷണം നൽകാൻ പുറത്തിറങ്ങിയപ്പോഴായിരുന്നു ആക്രമണം. തുടർന്ന് ചൊവ്വാഴ്ച മറ്റ് അഞ്ച് പേരെയും ഒരു ആടിനെയും നായ കടിച്ചു. പിന്നീട് ചത്ത നായയ്ക്ക് പേവിഷബാധ സ്ഥിരീകരിച്ചിരുന്നു.

കഴിഞ്ഞ ദിവസം മൂവാറ്റുപുഴയിൽ കുട്ടികൾ ഉൾപ്പെടെ എട്ട് പേരെ കടിച്ച തെരുവുനായയ്ക്കും പേവിഷബാധ സ്ഥിരീകരിച്ചു. വ്യാഴാഴ്ച രാവിലെ തൃക്ക, ആസാദ് റോഡ്, കടവുംപാടം, പുളിഞ്ചുവട് എന്നിവിടങ്ങളിൽ നടന്ന ആക്രമണത്തിൽ ആടിനെയും പശുവിനെയും നായ കടിച്ചിരുന്നു. പോസ്റ്റ്മോർട്ടം റിപ്പോർട്ടിലാണ് പേവിഷബാധ വ്യക്തമായത്. നായയെ നഗരസഭ കോമ്പൗണ്ടിൽ നിരീക്ഷണത്തിൽ പാർപ്പിച്ചിരുന്നെങ്കിലും ഞായറാഴ്ച ഉച്ചയോടെ അത് ചത്തു.

കടിയേറ്റവർക്ക് വാക്സിൻ നൽകിയിട്ടുണ്ടെന്നും ആശങ്ക വേണ്ടെന്നും നഗരസഭ അധികൃതർ അറിയിച്ചു. മൂവാറ്റുപുഴ നഗരസഭ പേവിഷബാധ സ്ഥിരീകരിച്ചതിനെ തുടർന്ന് അടിയന്തര യോഗം ചേർന്ന് സ്ഥിതി വിലയിരുത്തി. കടിയേറ്റവർ മൂവാറ്റുപുഴ ജനറൽ ആശുപത്രിയിൽ ചികിത്സ തേടിയിരുന്നു. തുടർച്ചയായ തെരുവുനായ ആക്രമണങ്ങൾ ആലപ്പുഴയിലും മൂവാറ്റുപുഴയിലും ജനങ്ങൾക്കിടയിൽ ഭീതി പരത്തിയിട്ടുണ്ട്. തെരുവുനായകളെ നിയന്ത്രിക്കാൻ അധികൃതർ ശക്തമായ നടപടികൾ സ്വീകരിക്കണമെന്നാണ് നാട്ടുകാരുടെ ആവശ്യം.