ന്യൂഡൽഹി: ഇന്ത്യയിൽ ചൈനീസ് അക്കൗണ്ടുകൾക്ക് വീണ്ടും വിലക്ക്. സിൻഹുവ വാർത്താ ഏജൻസിയുടെ എക്‌സ് അക്കൗണ്ടിനാണ് വിലക്ക് ഏർപെടുത്തിയിരിക്കുന്നത്. ഓപ്പറേഷൻ സിന്ദൂറുമായി ബന്ധപ്പെട്ട തെറ്റായ വിവരങ്ങൾ പ്രസിദ്ധീകരിക്കുന്നു എന്ന് ചൂണ്ടിക്കാട്ടിയാണ് വിലക്ക്.  
ചൈനീസ് സർക്കാർ ഉടമസ്ഥതയിലുള്ള ഗ്ലോബൽ ടൈംസിന്റെയും തുർക്കിയുടെ ടിആർടി വേൾഡിന്റെയും എക്സ് അക്കൗണ്ടുകളും ഇന്ത്യ വിലക്കിയിട്ടുണ്ട്.  

ചൈനീസ് കമ്മ്യൂണിസ്റ്റ് പാർട്ടിയുടെ കീഴിലുള്ള പീപ്പിൾസ് ഡെയ്‌ലിയുടെ ഇംഗ്ലീഷ് ടാബ്ലോയിഡ് ആണ് ഗ്ലോബൽ ടൈംസ്. ചൈനയുടെ ഔദ്യോഗിക വാർത്താ ഏജൻസിയാണ് സിൻഹുവ. 

സൈനിക നടപടിയെക്കുറിച്ചുള്ള തെറ്റായ വാർത്തകൾ നൽകിയതിന് പിന്നാലെ ഗ്ലോബൽ ടൈംസിന് ചൈനയിലെ ഇന്ത്യൻ എംബസി മുന്നറിയിപ്പ് നൽകിയിരുന്നു. തെറ്റായ വിവരങ്ങൾ പ്രചരിപ്പിക്കുന്നതിന് മുമ്പ് വസ്തുതകൾ പരിശോധിക്കണമെന്നും കൃത്യത ഉറപ്പാക്കണമെന്നും എംബസി നിർദേശിച്ചിരുന്നു. 

'അടിസ്ഥാനരഹിതമായ അവകാശവാദങ്ങൾ പ്രചരിപ്പിക്കുകയും പൊതുജനങ്ങളെ തെറ്റിദ്ധരിപ്പിക്കാൻ ശ്രമിക്കുകയുമാണ് പാകിസ്താൻ അനുകൂല ഹാൻഡിലുകൾ ചെയ്യുന്നത്. ഉറവിടങ്ങൾ പരിശോധിക്കാതെ മാധ്യമങ്ങൾ ഇത്തരം വിവരങ്ങൾ പങ്കുവെക്കുന്നത് മാധ്യമപ്രവർത്തന ധാർമ്മികതയിലെ വലിയ വീഴ്ചയാണ്' -എംബസിയുടെ പോസ്റ്റിൽ ചൂണ്ടിക്കാട്ടി. 

സംഘർഷങ്ങൾ വർധിച്ചതുമുതൽ പ്രസ് ഇൻഫർമേഷൻ ബ്യൂറോ (പി.ഐ.ബി) ഫാക്ട് ചെക്ക് യൂണിറ്റ് ഇത്തരം വാർത്തകൾ പ്രചരിപ്പിക്കുന്നത് സൂക്ഷ്മമായി നിരീക്ഷിച്ചിരുന്നു. തെറ്റിദ്ധരിപ്പിക്കുന്ന നിരവധി ദൃശ്യങ്ങളും കേന്ദ്ര സർക്കാർ ഏജൻസി കണ്ടെത്തിയിട്ടുണ്ട്.