ന്യൂഡല്‍ഹി: ഇന്ത്യയുടെ 52-ാമത് സുപ്രീം കോടതി ചീഫ് ജസ്റ്റിസായി ബി.ആര്‍ ഗവായ് ചുമതലയേറ്റെടുത്തു. രാഷ്ട്രപതി ഭവനില്‍ നടന്ന ചടങ്ങില്‍ രാഷ്ട്രപതി ദ്രൗപതി മുര്‍മുവാണ് ഗവായ്ക്ക് സത്യവാചകം ചെല്ലിക്കൊടുത്തത്. പ്രധാനമന്ത്രി നരേന്ദ്ര മോദിയും ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധിയും ചടങ്ങിന് എത്തിയിരുന്നു. 

ഹിന്ദിയിലാണ് അദ്ദേഹം സത്യവാചകം ചൊല്ലിയത്. സഞ്ജീവ് ഖന്ന വിരമിച്ചതോടെയാണ് ബി.ആര്‍ ഗവായ് ചീഫ് ജസ്റ്റിസായത്. ചീഫ് ജസ്റ്റിസ് പദവിയില്‍ അദ്ദേഹത്തിന് ആറു മാസം തുടരാനാകും. 

ഈ വര്‍ഷം നവംബര്‍ 23വരെയാകും ഗവായ് പദവിയില്‍ തുടരുക. മഹാരാഷ്ട്രയില്‍ നിന്നുള്ള പ്രമുഖ അംബേദ്കറൈറ്റ് നേതാവും റിപ്പബ്ലിക്കന്‍ പാര്‍ട്ടി നേതാവും മുന്‍ കേരള ഗവര്‍ണറുമായ ആര്‍.എസ് ഗവായിയുടെ മകനാണ് ബി.ആര്‍ ഗവായ്.

അതേസമയം വിരമിച്ചതിനു ശേഷം ഔദ്യോഗിക പദവികള്‍ വഹിക്കില്ലെന്ന് ജസ്റ്റിസ് സഞ്ജീവ് ഖന്ന പറഞ്ഞിരുന്നു. ഇന്ത്യയുടെ പരമോന്നത നീതിപീഠത്തിന്റെ മൂല്യങ്ങളും ഭരണഘടനയുടെ അടിസ്ഥാന തത്വങ്ങളും ഉടര്‍ത്തിപ്പിടിക്കാന്‍ ഗവായിക്ക് ആകുമെന്നും ഖന്ന പറഞ്ഞു.

1960ല്‍ മഹാരാഷ്ട്രയിലാണ് ഭൂഷണ്‍ രാമകൃഷ്ണ ഗവായ് എന്ന ബിആര്‍ ഗവായ് ജനിച്ചത്. പ്രശസ്ത സാമൂഹിക പ്രവർത്തകനും മുൻ ഗവർണറുമായിരുന്ന ആർ എസ് ഗവായിയുടെ മകനാണ് ഇദ്ദേഹം. 1985ൽ മുൻ അഡ്വക്കേറ്റ് ജനറലും ഹൈക്കോടതി ജഡ്ജിയുമായ രാജ എസ് ബോൺസാലെയുടെ കീഴിൽ നിയമപരിശീലനം ആരംഭിച്ചു. 1987 മുതൽ ബോംബെ ഹൈക്കോടതിയിൽ സ്വതന്ത്രമായി പ്രാക്ടീസ് ചെയ്ത അദ്ദേഹം, 1990 മുതൽ നാഗ്പൂർ ബെഞ്ചിൽ ശ്രദ്ധ കേന്ദ്രീകരിച്ചു. നാഗ്പൂർ, അമരാവതി മുനിസിപ്പൽ കോർപ്പറേഷനുകൾ, അമരാവതി സർവകലാശാല, സികോം തുടങ്ങിയ സ്ഥാപനങ്ങളെ പ്രതിനിധീകരിച്ചിട്ടുണ്ട്.

1992ൽ ബോംബെ ഹൈക്കോടതിയുടെ നാഗ്പൂർ ബെഞ്ചിൽ അസിസ്റ്റന്റ് ഗവൺമെന്റ് പ്ലീഡറായും 2000ൽ ഗവൺമെന്റ് പ്ലീഡറും പബ്ലിക് പ്രോസിക്യൂട്ടറുമായും നിയമിതനായി. 2003 നവംബർ 14ന് ബോംബെ ഹൈക്കോടതിയിൽ അഡീഷണൽ ജഡ്ജിയായും 2005 നവംബർ 12ന് സ്ഥിരം ജഡ്ജിയായും നിയമിതനായി. 2019 മെയ് 24ന് സുപ്രീം കോടതി ജഡ്ജിയായി ഉയർത്തപ്പെട്ടു.