റിയാദ്: യുദ്ധം അവസാനിപ്പിക്കാന്‍ യു.എസുമായി ചേര്‍ന്ന് പ്രവര്‍ത്തിക്കുമെന്ന് സഊദി കിരീടാവകാശി. ഫലസ്തീനില്‍ പൂര്‍ണമായ യുദ്ധ വിരാമമാണ് ഉച്ചകോടി ആവശ്യപ്പെട്ടത്. ഫലസ്തീന്‍ വിഷയത്തില്‍ തീരുമാനം ഉണ്ടാകണമെന്നും ഗസ്സ യുദ്ധം അവസാനിപ്പിക്കണമെന്നും സഊദി കിരീടാവകാശി ചൂണ്ടിക്കാട്ടി. ഇതിനായി യു.എസുമായി കൈകോര്‍ക്കുമെന്ന് അദ്ദേഹം ആവര്‍ത്തിച്ചു.  

ഗസ്സ യുദ്ധം അവസാനിപ്പിക്കാന്‍ ഒരുമിച്ച് നില്‍ക്കണമെന്ന് ആവശ്യപ്പെട്ട ട്രംപ് ഗള്‍ഫ് രാഷ്ട്രങ്ങളുടെ ശ്രമങ്ങള്‍ അഭിനന്ദനാര്‍ഹമെന്നും വ്യക്തമാക്കി. 
ഗസ്സയിലെ എല്ലാ ബന്ദികളെയും മോചിപ്പിക്കണമെന്ന് അദ്ദേഹം ആവശ്യപ്പെട്ടു. യുഎസ് ബന്ദിയെ വിട്ടയച്ചതിലൂടെ കഴിഞ്ഞത് നല്ലൊരു ദിവസമായിരുന്നുവെന്നും ഉച്ചകോടിയില്‍ സംസാരിക്കവേ ട്രംപ് പറഞ്ഞു. അതേ സമയം ഹമാസ് അധികാരത്തില്‍ തുടരുന്നതിനോടുള്ള വിയോജിപ്പും അമേരിക്കന്‍ പ്രസിഡന്റ് പ്രകടിപ്പിച്ചു. ഫലസ്തീനികള്‍ക്ക് അന്തസ്സുള്ള ജീവിതം വേണം, എന്നാല്‍ ആളുകളെ തട്ടിക്കൊണ്ടുപോകുന്ന ഭരണകൂടമുള്ളപ്പോള്‍ അത് സാധ്യമല്ല- ട്രംപ് പറഞ്ഞു.  അബ്രഹാം കരാറിലേക്ക് കൂടുതല്‍ രാജ്യങ്ങളെ എത്തിക്കാന്‍ ശ്രമം തുടരുമെന്നും ട്രംപ് വ്യക്തമാക്കി.

സിറിയയുമായുള്ള അമേരിക്കയുടെ ബന്ധം മെച്ചപ്പെടുത്തുമെന്നും ട്രംപ് സൂചിപ്പിച്ചു. ഉച്ചകോടിക്ക് മുന്നേ സിറിയന്‍ പ്രസിഡണ്ട് അഹ്‌മദ് അല്‍ ഷാറയുമായി ട്രംപ് കൂടിക്കാഴ്ച നടത്തിയിരുന്നു. സിറിയന്‍ വിദേശകാര്യ മന്ത്രിയുമായി മാര്‍ക്കോ റൂബിയോ ചര്‍ച്ച നടത്തുമെന്നും ട്രംപ് സൂചിപ്പിച്ചു. 
സഊദി കിരീടാവകാശിയുമായി സംസാരിച്ച് സിറിയയിലെ സ്ഥിതിഗതികള്‍ വിലയിരുത്തും. സിറിയക്ക് മേലുള്ള എല്ലാ നിയന്ത്രണങ്ങളും യുഎസ് നീക്കുമെന്നും ട്രംപ് കൂട്ടിച്ചേര്‍ത്തു. 

ഇറാനുമായി അമേരിക്ക കരാര്‍ ആഗ്രഹിക്കുന്നുണ്ടന്നെ് പറഞ്ഞ യു.എസ് പ്രസിഡന്റ് ഇറാന്‍ ആണവായുധം നേടാന്‍ പാടില്ലെന്നും തീവ്രവാദത്തിനുള്ള ഫണ്ടിംഗ് അവസാനിപ്പിക്കണമെന്നും ചൂണ്ടിക്കാട്ടി. ലബനാനിലേക്കുള്ള ആയുധക്കടത്ത് തടയണമെന്നും ഹിസ്ബുല്ലയുടെ നിയന്ത്രണത്തില്‍ നിന്ന് ലബനാന്‍ മോചിതമാകണമെന്നും അദ്ദേഹം പറഞ്ഞു. യമനിലെ രാഷ്ട്രീയ പ്രതിസന്ധിക്ക് പരിഹാരം കാണണം. അവിടുത്തെ രാഷ്ട്രീയ കക്ഷികളുമായി ഗള്‍ഫ് രാജ്യങ്ങള്‍ ചര്‍ച്ച തുടരണം ട്രംപ് പറഞ്ഞു.