പട്‌ന: ബിഹാറില്‍ തനിച്ച് മല്‍സരിച്ച അസദുദ്ദീന്‍ ഉവൈസിയുടെ മജ്‌ലിസെ ഇത്തിഹാദുല്‍ മുസ്‌ലിമീനെതിരേ കോണ്‍ഗ്രസ് രംഗത്ത്. 

ബി.ജെ.പിക്കെതിരായ വിശാല ഐക്യമുന്നണിയായ മഹാസഖ്യത്തോടൊപ്പം നില്‍ക്കാതെ തനിച്ച് മല്‍സരിച്ച ഉവൈസിയുടെ നടപടി ബി.ജെ.പിക്ക് സഹായകരമായെന്ന് കോണ്‍ഗ്രസിന്റെ ലോക്‌സഭാ കക്ഷി നേതാവ് അധിര്‍ രഞ്ജന്‍ ചൗധരി പറഞ്ഞു. തങ്ങള്‍ക്ക് അനുകൂലമായ സാഹചര്യം ഒരുക്കാനായി ഉവൈസിയുടെ പാര്‍ട്ടിയെ ബി.ജെ.പി ഉപയോഗിക്കുകയാണ്.

 ബി.ജെ.പി വിരുദ്ധ വോട്ടുകള്‍ ഭിന്നിപ്പിക്കുന്ന ഉവൈസിയുടെ നീക്കങ്ങളെ കുറിച്ച് മുഴുവന്‍ മതേതരകക്ഷികളും കരുതിയിരിക്കേണ്ടതുണ്ട്. ബിഹാറില്‍ മഹാസഖ്യത്തിന് വിജയം ഉറപ്പായിരുന്നു. എന്നാല്‍, ചെറുകക്ഷികള്‍ വിജയം തടഞ്ഞു. 

മഹാസഖ്യത്തെ ലക്ഷ്യമിടാന്‍ ബി.ജെ.പി ഉവൈസിയെ ഉപയോഗിക്കുകയാണ്. നിതീഷിന്റെ വോട്ടുകള്‍ പിളര്‍ത്താന്‍ ചിരാഗ് പാസ്വാനെ അവര്‍ ഉപയോഗിച്ചത് പോലെ- ചൗധരി കൂട്ടിച്ചേര്‍ത്തു. ബിഹാറില്‍ 20 മണ്ഡലങ്ങളിലാണ് മജ്‌ലിസ് മല്‍സരിച്ചത്.