കല്‍പ്പറ്റ: ജില്ലയിലെ ഹയര്‍ സെക്കന്‍ഡറി പ്രിന്‍സിപ്പല്‍സ് ഫോറം വിഭാവനം ചെയ്ത് നടപ്പിലാക്കുന്ന 'ടുഗദര്‍ ടുവേഡ്‌സ് ' എന്ന ദീര്‍ഘകാല വിദ്യാഭ്യാസ പദ്ധതിയുടെ പ്രഥമപരിപാടിയായി ജില്ലാ കലക്ടര്‍ കേശവേന്ദ്ര കുമാര്‍ നയിക്കുന്ന സിവില്‍ സര്‍വിസ് ഓറിയന്റേഷന്‍ പ്രോഗ്രാമിന് തുടക്കമായി. കല്‍പ്പറ്റ സിവില്‍ സ്‌റ്റേഷനിലെ എ.പി.ജെ അബ്ദുല്‍കലാം മെമ്മോറിയല്‍ ഹാളില്‍ നടന്ന പരിപാടിയില്‍ ജില്ലാ കലക്ടര്‍ക്കു പുറമെ ജില്ലാ പൊലിസ് മേധാവി കെ കാര്‍ത്തികും ക്ലാസെടുത്തു. ജില്ലാ പഞ്ചായത്ത് പ്രസിഡന്റ് ടി ഉഷാകുമാരി 'ടുഗദര്‍ ടുവേഡ്‌സ് ' പദ്ധതിയുടെ ഉദ്ഘാടനം നിര്‍വഹിച്ചു.
പ്രിന്‍സിപ്പല്‍സ് ഫോറത്തിന്റെ പദ്ധതി ജില്ലാ പഞ്ചായത്ത് ഏറ്റെടുത്ത് ജില്ലയിലെ എല്ലാ പഞ്ചായത്തുകളിലും നടപ്പിലാക്കുമെന്ന് അവര്‍ അറിയിച്ചു. സിവില്‍ സര്‍വിസ് ഓറിയന്റേഷന്‍ പ്രോഗ്രാമിന്റെ ഉദ്ഘാടനം ജില്ലാ പഞ്ചായത്ത് വൈസ് പ്രസിഡന്റ് പി.കെ അസ്മത്ത് നിര്‍വഹിച്ചു. ജില്ലാ പഞ്ചായത്ത് വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്‌സന്‍ എ ദേവകി അധ്യക്ഷയായി. ഹയര്‍ സെക്കന്‍ഡറി പ്രിന്‍സിപ്പല്‍ ഫോറം ജില്ലാ കോഓഡിനേറ്റര്‍ കെ.കെ വര്‍ഗീസ്, കണ്‍വീനര്‍ ഇ.ജി രാജു, പ്രസിഡന്റ് യു.വി ചന്ദ്രിക, സെക്രട്ടറി കെ.ജി ജോസ് സംസാരിച്ചു. സ്‌കൂളുകളുടെ പഠന നിലവാരം ഉയര്‍ത്തുന്നതോടൊപ്പം ജില്ലയുടെ പൊതുവായ വിദ്യാഭ്യാസ വികസന നേട്ടം കൂടി പദ്ധതി ലക്ഷ്യമിടുന്നതായി ഭാരവാഹികള്‍ അറിയിച്ചു. മത്സര പരീക്ഷയും ഉന്നതജോലിയും സാമ്പത്തികമായി പിന്നാക്കം നില്‍ക്കുന്നവര്‍ക്കും സാധ്യമാക്കുക എന്നതും ലക്ഷ്യമിടുന്നു. പരിപാടിയില്‍ ജില്ലയുടെ വിവിധ ഭാഗങ്ങളില്‍നിന്നുള്ള പ്ലസ്ടു, കോളജ് വിദ്യാര്‍ഥികള്‍ പങ്കെടുത്തു.