കോഴിക്കോട്: സംവരണ അട്ടിമറിക്കെതിരേ സമസ്ത സംവരണ സംരക്ഷണ സമിതി നടത്തുന്ന ഒപ്പു ശേഖരണം വന്‍ വിജയമാക്കാന്‍ എസ്.കെ.എസ്.എസ്.എഫ് സംസ്ഥാന സെക്രട്ടേറിയറ്റ് യോഗം തീരുമാനിച്ചു. പ്രസിഡന്റ് ഹമീദലി ശിഹാബ് തങ്ങള്‍ അധ്യക്ഷനായി.
ഓരോ പള്ളികള്‍ക്കു മുന്നിലും ബാനറോട് കൂടിയ കൗണ്ടര്‍ രാവിലെ 10 മുതല്‍ പ്രവര്‍ത്തിക്കും. കൊവിഡ് കാരണം പള്ളികളിലേക്ക് വരാന്‍ കഴിയാത്തവരില്‍നിന്നും ഒപ്പുകള്‍ ശേഖരിക്കും.
മഹല്ലുകളില്‍നിന്ന് ശേഖരിക്കുന്ന ഒപ്പുകള്‍ ശാഖാ കമ്മിറ്റികള്‍ 14നു ക്ലസ്റ്റര്‍ കമ്മിറ്റിയെയും 15നു ക്ലസ്റ്റര്‍ കമ്മിറ്റി മേഖലാ കമ്മിറ്റികളെയും 16നു മേഖലാ കമ്മിറ്റികള്‍ ജില്ലാ കമ്മിറ്റികളെയും ഏല്‍പ്പിക്കുന്ന രീതിയിലാണ് ക്രമീകരിച്ചിരിക്കുന്നത്.
ഫഖ്‌റുദ്ദീന്‍ തങ്ങള്‍ കണ്ണന്തളി, ഹബീബ് ഫൈസി കൊട്ടോപാടം, ആഷിക് കുഴിപ്പുറം, ടി.പി സുബൈര്‍ മാസ്റ്റര്‍ കുറ്റിക്കാട്ടൂര്‍, എം.എ ജലീല്‍ ഫൈസി അരിമ്പ്ര, ഒ.പി.എം അഷ്‌റഫ് കുറ്റിക്കടവ്, ഡോ. അബ്ദുല്‍ മജീദ് കൊടക്കാട്, ശുഹൈബ് നിസാമി നീലഗിരി, ശഹീര്‍ അന്‍വരി പുറങ്ങ്, ഫൈസല്‍ ഫൈസി മടവൂര്‍, ഹാശിറലി ശിഹാബ് തങ്ങള്‍, മുഹമ്മദ് ഫൈസി, ഷമീര്‍ ഫൈസി ഒടമല, സി.ടി അബ്ദുല്‍ ജലീല്‍ പട്ടര്‍കുളം സംബന്ധിച്ചു. ജന. സെക്രട്ടറി സത്താര്‍ പന്തലൂര്‍ സ്വാഗതവും താജുദ്ദീന്‍ ദാരിമി പടന്ന നന്ദിയും പറഞ്ഞു.