കൊച്ചി: സ്വര്‍ണക്കടത്തുമായി ബന്ധപ്പെട്ട കള്ളപ്പണം വെളുപ്പിക്കല്‍ കേസില്‍ എറണാകുളം പ്രിന്‍സിപ്പല്‍ സെഷന്‍സ് കോടതി രണ്ടാഴ്ചത്തേക്ക് റിമാന്‍ഡ് ചെയ്ത മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം.ശിവശങ്കറെ തടവുകാരെ പാര്‍പ്പിക്കുന്ന കൊവിഡ് ഫസ്റ്റ്‌ലൈന്‍ ട്രീറ്റ്‌മെന്റ് സെന്ററിലേക്ക് മാറ്റി.
കാക്കനാട് ജില്ലാ ജയിലിന് സമീപമുള്ള ബോസ്റ്റല്‍ സ്‌കൂളാണ് നിലവില്‍ ജയില്‍ വകുപ്പിന്റെ ഫസ്റ്റ്‌ലൈന്‍ ട്രീറ്റ്‌മെന്റ് സെന്ററായി പ്രവര്‍ത്തിക്കുന്നത്. ഇവിടേക്കാണ് ശിവശങ്കറെ മാറ്റിയത്. കൊവിഡ് പരിശോധനയ്ക്കായി നേരത്തേ തന്നെ സാംപിള്‍ ശേഖരിച്ചിരുന്നു. ഇതിന്റെ ഫലം വന്നതിനു ശേഷമേ അദ്ദേഹത്തെ ജയിലിലേക്ക് മാറ്റുന്നതു പരിഗണിക്കുകയുള്ളൂ.
എറണാകുളം ജില്ലാ കോടതിയില്‍ നിന്ന് എന്‍ഫോഴ്‌സ്‌മെന്റ് ഡയരക്റ്ററേറ്റിന്റെ വാഹനത്തിലാണ് ശിവശങ്കറെ കാക്കനാട്ടേക്ക് കൊണ്ടു പോയത്. വൈകിട്ട് അഞ്ചേകാലോടെയാണ് കോടതിയിലെ നടപടിക്രമങ്ങള്‍ പുര്‍ത്തിയായത്.
എന്‍ഫോഴ്‌സ്‌മെന്റ് ഉദ്യോഗസ്ഥരും അദ്ദേഹത്തോടൊപ്പമുണ്ടായിരുന്നു.