തൃശൂര്‍: ചലച്ചിത്ര താരം കലാഭവന്‍ മണിയുടെ മരണം സംബന്ധിച്ച അന്വേഷണം സി.ബി.ഐ ഏറ്റെടുത്തു. കലാഭവന്‍ മണിയുടെ കുടുംബാംഗങ്ങള്‍ നല്‍കിയ പരാതിയുടെ അടിസ്ഥാനത്തില്‍ ഹൈക്കോടതി ഉത്തരവിനെ തുടര്‍ന്നാണിപ്പോള്‍ സി.ബി.ഐ അന്വേഷണം ആരംഭിച്ചത്. സി.ബി.ഐ എറണാകുളം യൂനിറ്റാണ് കേസന്വേഷിക്കുന്നത്. സി.ബി.ഐ ഡിവൈ.എസ്.പി ജോര്‍ജ് ജെയിംസിനാണ് അന്വേഷണ ചുമതല. ഇതിന്റെ ഭാഗമായി സി.ബി.ഐ സംഘം കേസ് സംബന്ധിച്ച രേഖകള്‍ ഏറ്റുവാങ്ങി.
സി.ബി.ഐ സര്‍ക്കിള്‍ ഇന്‍സ്‌പെക്ടര്‍ ഡി.വിനോദും സംഘവും ഇന്നലെ ഉച്ചയോടെയാണ് ചാലക്കുടി സര്‍ക്കിള്‍ ഇന്‍സ്‌പെക്ടറുടെ ഓഫിസിലെത്തി രേഖകള്‍ ഏറ്റുവാങ്ങിയത്. ഏഴ് വോള്യങ്ങളിലായി 2229 പേജടങ്ങിയ റിപ്പോര്‍ട്ടാണ് ചാലക്കുടി സര്‍ക്കിള്‍ ഇന്‍സ്‌പെക്ടറുടെ ഓഫിസ് സി.ബി.ഐക്ക് കൈമാറിയത്. പോസ്റ്റുമോര്‍ട്ടം, ഇന്‍ക്വസ്റ്റ് എന്നിവയുടെ ഡിജിറ്റല്‍ രേഖകളും റിപ്പോര്‍ട്ടുകളും, കേസന്വേഷണവുമായി ചോദ്യം ചെയ്ത ആയിരത്തോളം പേരുടെ വിഡിയോ സി.ഡി.കളും ഇതില്‍ ഉള്‍പ്പെടും.
സി.ബി.ഐ ഇനി വീണ്ടും കേസ് റജിസ്റ്റര്‍ ചെയ്യും. അതിന് ശേഷമാണ് അന്വേഷണം ആരംഭിക്കുക. കോടതി ഉത്തരവിനെ തുടര്‍ന്ന് എറണാകുളം യൂണിറ്റ് സി.ബി.ഐ ആസ്ഥാന കേന്ദ്രമായ ഡല്‍ഹിയിലേക്ക് അന്വേഷണം ആരംഭിക്കുന്നത് സംബന്ധിച്ചുള്ള അപേക്ഷ നല്‍കിയിരുന്നു. ഡല്‍ഹിയില്‍നിന്ന് കഴിഞ്ഞ ദിവസം ഉത്തരവ് ലഭിച്ചതിനെ തുടര്‍ന്നാണ് രേഖകള്‍ ഏറ്റുവാങ്ങാനായി സംഘമെത്തിയത്.
കഴിഞ്ഞ വര്‍ഷം മാര്‍ച്ച് 6നാണ് കലാഭവന്‍ മണി എറണാകുളത്തുള്ള സ്വകാര്യ ആശുപത്രിയില്‍വച്ച് ദുരൂഹസാഹചര്യത്തില്‍ മരണമടഞ്ഞത്. തലേ ദിവസം അര്‍ധരാത്രിയില്‍ മണിയുടെ ചേനത്തുനാടിലുള്ള ഔട്ട് ഹൗസായ പാഡിയില്‍വച്ച് അബോധാവസ്ഥയിലായ മണിയെ സുഹൃത്തുക്കളാണ് ആശുപത്രിയിലെത്തിച്ചത്. മരണത്തില്‍ ദുരൂഹതയുണ്ടെന്ന് അന്നേ ആരോപണമുണ്ടായിരുന്നു. രണ്ട് ലാബുകളിലായി നടത്തിയ ആന്തരികാവയവങ്ങളുടെ പരിശോധനാ റിപ്പോര്‍ട്ടില്‍ വന്ന വൈരുദ്ധ്യവും ദുരൂഹതക്ക് ആക്കം കൂട്ടി. മണിയുടെ ശരീരത്തില്‍ വിഷാംശം പ്രവേശിച്ചതെങ്ങനെയെന്നത് സംബന്ധിച്ച് വ്യക്തത വരുത്താന്‍ അന്വേഷണ ഉദ്യാഗസ്ഥര്‍ക്കായില്ല.
ആദ്യം ലോക്കല്‍ പൊലിസും പിന്നീട് പ്രത്യേക അന്വേഷണ സംഘവും അന്വേഷണം നടത്തി. എന്നാല്‍, അന്വേഷണം തൃപ്തികരമല്ലെന്നും സി.ബി.ഐക്ക് വിടണമെന്നും ആവശ്യപ്പെട്ട് കുടുംബാംഗങ്ങള്‍ രംഗത്തെത്തിയതോടെ സര്‍ക്കാര്‍ അന്വേഷണം സി.ബി.ഐക്ക് വിട്ടു. സി.ബി.ഐ അന്വേഷണം ഏറ്റെടുക്കാത്തതിനെ തുടര്‍ന്ന് കുടുംബാംഗങ്ങള്‍ ഹൈക്കോടതിയെ സമീപിക്കുകയായിരുന്നു. ഹൈക്കോടതിയുടെ ഉത്തരവിനെ തുടര്‍ന്നാണ് ഇപ്പോള്‍ സി.ബി.ഐ ഇപ്പോള്‍ അന്വേഷണം ആരംഭിച്ചത്.