മസ്‌കത്ത്: പശ്ചിമേഷ്യയില്‍ സംഘര്‍ഷാവസ്ഥ ദിനംപ്രതി രൂക്ഷമാകുന്നതിനിടെ നയതന്ത്ര തലത്തില്‍ നിര്‍ണായക ഇടപെടലുകള്‍ തുടരുകയാണ്. ഈ സാഹചര്യത്തില്‍ ഒമാന്റെ വിദേശകാര്യ മന്ത്രി ബദര്‍ ബിന്‍ ഹമദ് അല്‍ ബുസൈദി ഐക്യരാഷ്ട്രസഭാ സെക്രട്ടറി ജനറല്‍ അന്റോണിയോ ഗുട്ടറസുമായി ടെലിഫോണ്‍ മുഖേന ആശയവിനിമയം നടത്തി. മേഖലയില്‍ നിലനില്‍ക്കുന്ന സുരക്ഷാ വെല്ലുവിളികളും സംഘര്‍ഷത്തിന്റെ വ്യാപന സാധ്യതകളും ചര്‍ച്ചയുടെ പ്രധാന വിഷയങ്ങളായി.

സംഘര്‍ഷം നിയന്ത്രണാതീതമാകാതിരിക്കാനും അതിന്റെ പ്രത്യാഘാതങ്ങള്‍ അയല്‍രാജ്യങ്ങളിലേക്കും ആഗോള തലത്തിലേക്കും വ്യാപിക്കാതിരിക്കാനും അന്താരാഷ്ട്ര സമൂഹം ഏകോപിതമായി ഇടപെടേണ്ടതുണ്ടെന്ന് ഇരുവരും വിലയിരുത്തി. സൈനിക നീക്കങ്ങള്‍ പ്രശ്‌നങ്ങളെ കൂടുതല്‍ സങ്കീര്‍ണ്ണമാക്കുമെന്ന ആശങ്കയും ഉയര്‍ന്നിരുന്നു. അതേസമയം, നയതന്ത്ര ചര്‍ച്ചകള്‍, വിശ്വാസനിര്‍മ്മാണ നടപടികള്‍, സമാധാന ശ്രമങ്ങള്‍ എന്നിവക്ക് മുന്‍ഗണന നല്‍കേണ്ടത് അനിവാര്യമാണെന്ന നിലപാട് ഒമാന്‍ ആവര്‍ത്തിച്ചു.

മേഖലയിലെ പ്രശ്‌നങ്ങളില്‍ ഒമാന്‍ സ്വീകരിച്ചു വരുന്ന സമതുലിത നിലപാട് ഐക്യരാഷ്ട്രസഭ ശ്രദ്ധയില്‍പ്പെടുത്തിയതായി സൂചനകളുണ്ട്. ആശയവിനിമയത്തിന് വാതിലുകള്‍ തുറന്നുവെക്കുകയും പരസ്പര വിശ്വാസം ശക്തിപ്പെടുത്താന്‍ ശ്രമിക്കുകയും ചെയ്യുന്ന ഒമാന്റെ സമീപനം സംഘര്‍ഷം ശമിപ്പിക്കാന്‍ സഹായകരമാണെന്ന് സെക്രട്ടറി ജനറല്‍ അഭിപ്രായപ്പെട്ടതായി വൃത്തങ്ങള്‍ അറിയിച്ചു.

സംഘര്‍ഷത്തിന്റെ പശ്ചാത്തലത്തില്‍ സാധാരണ ജനങ്ങള്‍ നേരിടുന്ന മാനുഷിക പ്രതിസന്ധിയും ചര്‍ച്ചയില്‍ പ്രാധാന്യം നേടി. പൗരന്മാരുടെ സുരക്ഷ ഉറപ്പാക്കുകയും മാനുഷിക സഹായം തടസമില്ലാതെ എത്തിക്കാനുള്ള അന്താരാഷ്ട്ര സംവിധാനങ്ങള്‍ ശക്തിപ്പെടുത്തുകയും വേണമെന്ന് അഭിപ്രായപ്പെട്ടു. സംഘര്‍ഷസ്ഥലങ്ങളില്‍ കുടുങ്ങിയവരുടെ അവസ്ഥ പരിഗണിച്ച് അടിയന്തര നടപടികള്‍ സ്വീകരിക്കേണ്ടതിന്റെ ആവശ്യകതയും ഉന്നയിച്ചു.

ദീര്‍ഘകാല സമാധാനത്തിന് രാഷ്ട്രീയ പരിഹാരമാണ് ഏക മാര്‍ഗമെന്ന് ഒമാന്‍ വ്യക്തമാക്കിയിട്ടുണ്ട്. വെടിനിര്‍ത്തല്‍ ശ്രമങ്ങള്‍ ശക്തിപ്പെടുത്തുകയും സംവാദത്തിന് അനുയോജ്യമായ അന്തരീക്ഷം സൃഷ്ടിക്കണമെന്നും ആവശ്യപ്പെട്ടു. എല്ലാ വിഭാഗങ്ങളും ആത്മസംയമനം പാലിക്കണമെന്നും പ്രകോപനപരമായ നടപടികള്‍ ഒഴിവാക്കണമെന്നും ചര്‍ച്ചയില്‍ ആവര്‍ത്തിച്ചു.

ALSO READ: സുരക്ഷ മുന്‍നിര്‍ത്തി നടപടി; ഒമാന്‍ എയര്‍ നിരവധി സര്‍വീസുകള്‍ റദ്ദാക്കി

ഇതിനുപുറമെ, മേഖലയിലെ മറ്റ് രാജ്യങ്ങളുമായി ഒമാന്‍ സജീവമായ ആശയവിനിമയം തുടരുന്നുണ്ടെന്നാണ് വിദേശകാര്യ വൃത്തങ്ങള്‍ അറിയിക്കുന്നത്. പ്രശ്‌നം വ്യാപിക്കാതിരിക്കാനും സ്ഥിരത വീണ്ടെടുക്കാനും കൂട്ടായ നീക്കം അനിവാര്യമാണെന്ന നിലപാട് ഒമാന്‍ മുന്നോട്ടുവെക്കുന്നു.

സംഘര്‍ഷാവസ്ഥ ഗുരുതരമാകുന്ന ഘട്ടത്തില്‍ നടന്ന ഈ സംഭാഷണം നയതന്ത്ര രംഗത്ത് ശ്രദ്ധേയമായ ഇടപെടലായി വിലയിരുത്തപ്പെടുന്നു. സമാധാനപരമായ പരിഹാരത്തിനായി എല്ലാ തലങ്ങളിലും ഇടപെടലുകള്‍ ശക്തിപ്പെടുത്തേണ്ടതിന്റെ ആവശ്യകത ഈ കൂടിക്കാഴ്ച വീണ്ടും ഓര്‍മ്മപ്പെടുത്തുന്നു.

Oman’s Foreign Minister Badr bin Hamad Al Busaidi held talks with UN Secretary-General Antonio Guterres on escalating regional tensions, stressing the need for diplomacy and peaceful solutions to ensure stability.