പത്തനംതിട്ട: റബര്‍ ബോര്‍ഡിനെ ഇല്ലാതാക്കാനുള്ള ആസൂത്രിത ശ്രമങ്ങളാണ് കേന്ദ്ര സര്‍ക്കാര്‍ നടത്തുന്നതെന്ന് ആന്റോ ആന്റണി എം.പി വാര്‍ത്താസമ്മേളനത്തില്‍ പറഞ്ഞു.
റബര്‍ കര്‍ഷകരില്‍ നിന്ന് പിരിച്ചെടുത്ത സെസ് തുകയായ 103 കോടി തിരികെനല്‍കാന്‍ കേന്ദ്ര സര്‍ക്കാര്‍ തയാറാകുന്നില്ല. 40 ലക്ഷത്തോളം വരുന്ന കേരളത്തിലെ റബര്‍ കര്‍ഷകരെ അവഗണിക്കുന്ന കേന്ദ്ര സര്‍ക്കാര്‍ നയം പ്രതിഷേധാര്‍ഹമാണ്.
കേരളത്തിലെ മൂന്ന് റീജ്യനല്‍ ഓഫിസുകളും 39 ഫീല്‍ഡ് ഓഫിസുകളും പ്രവര്‍ത്തനരഹിതമായി കഴിഞ്ഞു. ഇതോടെ നിരവധി കര്‍ഷകരാണ് പ്രതിസന്ധിയിലായത്. ചെലവ് ചുരുക്കലിന്റെ ഭാഗമായാണ് ഓഫിസുകളുടെ എണ്ണം വെട്ടിക്കുറയ്ക്കുന്നതെന്നാണ് അധികൃതരുടെ വിശദീകരണം.
റബര്‍ ബോര്‍ഡിന് സാമൂഹിക പ്രസക്തി ഇല്ലെന്നാണ് കേന്ദ്ര വാണിജ്യമന്ത്രാലയം പറയുന്നത്. കേന്ദ്ര സര്‍ക്കാരിന്റെ കര്‍ഷകദ്രോഹ നടപടികള്‍ പിന്‍വലിക്കുക, അടച്ചുപൂട്ടിയ ഓഫിസുകള്‍ തുറക്കുക, സബ്‌സിഡികള്‍ വിതരണം ചെയ്യുക എന്നീ ആവശ്യങ്ങള്‍ ഉന്നയിച്ച് ശക്തമായ സമരം സംഘടിപ്പിക്കുമെന്നും അദ്ദേഹം പറഞ്ഞു.
ഇക്കാര്യത്തില്‍ കോണ്‍ഗ്രസ് എം.പിമാര്‍ക്ക് പിന്തുണ പ്രഖ്യാപിച്ച് പാര്‍ലമെന്റിലേക്ക് മാര്‍ച്ച് സംഘടിപ്പിക്കുമെന്ന് ഡി.സി.സി പ്രസിഡന്റ് ബാബു ജോര്‍ജ് അറിയിച്ചു. വാര്‍ത്താസമ്മേളനത്തില്‍ കെ.പി.സി.സി സെക്രട്ടറി പഴകുളം മധുവും പങ്കെടുത്തു.