മെല്‍ബണ്‍: ഡിസംബര്‍ മാസത്തില്‍ ആരംഭിക്കുന്ന ഇന്ത്യയ്‌ക്കെതിരായ ടെസ്റ്റ് സീരിസില്‍ ആസ്‌ത്രേലിയ യുവതാരങ്ങള്‍ക്ക് അവസരം നല്‍കും. 22 കാരനായ ഓപ്പണിങ് ബാറ്റ്‌സ്മാന്‍ വില്‍ പുകോവ്‌സ്‌കിയും ഓള്‍റൗണ്ടറായ കാമറൂണ്‍ ഗ്രീനും ടീമില്‍ ഇടംനേടി. ഇരുവരെയും ഉള്‍പ്പെടുത്തി ഓസ്‌ട്രേലിയ 17 അംഗ ടീമിനെ പ്രഖ്യാപിച്ചു.

ആഭ്യന്തര മത്സരങ്ങളില്‍ മിന്നുന്ന പ്രകടനം കാഴ്ചവെച്ചതിന്റെ ബലത്തിലാണ് ഇരുവരെയും ടീമിലെടുത്തതെന്ന് കോച്ച് ജസ്റ്റിന്‍ ലാംഗര്‍ വ്യക്തമാക്കി. ഇരുവരെയും കൂടാതെ യുവതാരങ്ങളായ മൈക്കിള്‍ നെസെറിനെയും മിച്ചല്‍ സ്വെപ്‌സണും ടീമിലിടം നേടി.

നിലവില്‍ ടെസ്റ്റ് ക്രിക്കറ്റില്‍ ലോക ഒന്നാം നമ്പര്‍ ടീമായ ആസ്‌ത്രേലിയ ടിം പെയ്‌നിന്റെ നേതൃത്വത്തിലാണ് ലോക രണ്ടാം നമ്പറായ ഇന്ത്യയ്‌ക്കെതിരെ ഇറങ്ങുന്നത്. നാല് മത്സരങ്ങളടങ്ങുന്നതാണ് ടെസ്റ്റ് പരമ്പര. ആദ്യ ടെസ്റ്റ് ഡിസംബര്‍ 17 ന് ആരംഭിക്കും. ഡേ ആന്‍ഡ് നൈറ്റായാണ് ടെസ്റ്റ് നടക്കുക. ആസ്‌ത്രേലിയയില്‍ ഇന്ത്യ കളിക്കുന്ന ആദ്യ ഡെ ആന്‍ഡ് നൈറ്റ് ടെസ്റ്റ് മത്സരമായിരിക്കുമിത്.