കാക്കവയല്‍: സംസ്ഥാനത്തെ മികച്ച പി.ടി.എ ആയി തെരഞ്ഞെടുക്കപ്പെട്ട കാക്കവയല്‍ ഗവ. ഹയര്‍ സെക്കന്‍ഡറി സ്‌കൂള്‍ പി.ടി.എ കമ്മിറ്റി അവാര്‍ഡ് തുകയായ അഞ്ച് ലക്ഷം രൂപയില്‍ നിന്നും ഒരുലക്ഷം രൂപ ഇതേ സ്‌കൂളിലെ സ്വന്തമായി വീടില്ലാത്ത അഞ്ചാം ക്ലാസ്സുകാരന് വീടുപണിയുടെ തുടക്കത്തിന് മാറ്റിവെക്കുന്നു.
വീടുവെയ്ക്കാന്‍ ആവശ്യമായ അഞ്ച് സെന്റ് സ്ഥലം സ്‌കൂളിലെ പി.ടി.എ പ്രസിഡന്റും വയനാട് പി.എസ്.സി ഓഫീസിലെ ഉദ്യോഗസ്ഥനുമായ മഹേഷ്ബാബു സൗജന്യമായും നല്‍കും. വിദ്യാലയ വികസനസമിതി കാക്കവയല്‍ ടൗണില്‍ സംഘടിപ്പിച്ച അനുമോദന യോഗത്തിലാണ് മാതൃകാപരമായ ഇക്കാര്യം മഹേഷ് ബാബു അറിയിച്ചത്.
ചടങ്ങ് എം.എല്‍.എ സി.കെ ശശീന്ദ്രന്‍ ഉദ്ഘാടനം ചെയ്തു. മികച്ച പ്രവര്‍ത്തനങ്ങള്‍ കാഴ്ചവെച്ച മുന്‍ ഹെഡ്മിസ്ട്രസ്സ് ഗീത, മുന്‍ ഹെഡ്മാസ്റ്റര്‍ വി.പി രാജന്‍, ഹിന്ദി അധ്യാപകനായ ഗിരീഷ് ബാബു എന്നിവരെയും മികച്ച അക്കാദമിക നേട്ടങ്ങള്‍ കൈവരിച്ച പൂര്‍വ്വ വിദ്യാര്‍ത്ഥികളായ ക്ലിന്‍സ് ജാക്‌സണ്‍, കെ അജ്മല്‍, അനന്ത്‌ദേവ്, അനുശ്രീ എന്നിവരെ ആദരിച്ചു.വിദ്യാലയ വികസനസമിതി കണ്‍വീനര്‍ പി.വി കുര്യാക്കോസ് സ്വാഗതം പറഞ്ഞ ചടങ്ങില്‍ ജില്ലാ പഞ്ചായത്തംഗം കെ മിനി അധ്യക്ഷയായി. പ്രിന്‍സിപ്പാള്‍ പ്രസന്ന, സുരേഷ്‌കുമാര്‍, ഇന്ദു സംസാരിച്ചു.