പനമരം: നീര്‍വാരം, കല്ലുവയല്‍ പ്രദേശത്ത് ജനവാസകേന്ദ്രത്തിലെ കൃഷിയിടത്തില്‍ കളനാശിനി തളിച്ചതിനെ തുടര്‍ന്ന് സമീപത്തെ വീടുകളിലുള്ളവര്‍ക്ക് അസ്വസ്ഥതകളും ചര്‍ദി, പനി, തലവേദന, അതിയായ ക്ഷീണം എന്നിവ അനുഭവപ്പെടുകയും ചെയ്തതായി ആക്ഷേപം.
സ്വകാര്യ വ്യക്തിയാണ് സ്വന്തം കൃഷിയിടത്തിലും അതിരിലും വ്യാപകമായി വിഷപ്രയോഗം നടത്തിയത്. ഈ കൃഷിയിടത്തിനും പൊതുവഴിക്കും സമീപമുള്ള രണ്ടു വീടുകളിലെ കൊച്ചുകുട്ടികളും സ്ത്രീകളുമടക്കമുള്ളവര്‍ക്കാണ് ചര്‍ദി, പനി, തലവേദന, ക്ഷീണം എന്നിവ അനുഭവപ്പെട്ടത്. കേരളത്തില്‍ നിരോധിത കളനാശിനിയായ ഗ്രാമോക്‌സോന്‍, നിയന്ത്രിത കളനാശിനിയായ റൗണ്ട്അപ്പ്‌ഗ്ലൈസെല്‍ എന്നിവയിലൊന്നാണ് ഇവിടെ ഉപയോഗിച്ചിട്ടുള്ളതെന്ന് പ്രദേശവാസികളുടെ സംശയം. ജനവാസകേന്ദ്രങ്ങളില്‍ യാതൊരുവിധ സുരക്ഷാ മാനദണ്ഡങ്ങളും പാലിക്കാതെയാണ് കീടനാശിനികള്‍ അനിയന്ത്രിതമായി ഉപയോഗിക്കപ്പെടുന്നത്.
ചരിഞ്ഞ പ്രദേശമായതിനാല്‍ ഇവിടെ തളിക്കുന്ന കീടനാശിനികള്‍ മഴവെള്ളത്തോടൊപ്പം സമീപത്തെ കൃഷിയിടത്തിലൂടെയും വഴിയിലൂടെയുമാണ് ഒഴുകിപോകുകുക.
ഈ വഴിയിലൂടെ ഒഴുകിപോകുന്ന വെള്ളം സമീപവാസികളുടെ പുരയിടത്തിലൂടെയും കുടിവെള്ളത്തിനും വീട്ടാവശ്യങ്ങള്‍ക്കും ഉപയോഗിക്കുന്ന ശുദ്ധജല സ്രോതസിന് സമീപത്തുകൂടിയുമാണ് ഒഴികി വയലിനോടു ചേര്‍ന്നുകള്ള തോട്ടില്‍ ചേരുന്നത്. ജലസ്രോതസ്സ് വയലിന്റെ സമീപത്ത് ആയതിനാല്‍ മഴക്കാലത്ത് വഴിയിലൂടെ ഒഴുകുന്ന വെള്ളം കിണറിലും എത്തിചേരാറുണ്ട്. മുന്‍ വര്‍ഷങ്ങളില്‍ ഈ പ്രദേശത്ത് കീടനാശിനി പ്രയോഗങ്ങള്‍ ഉണ്ടായിരുന്നില്ല. എന്നാല്‍ 2016 മുതലാണ് കീടനനാശിനി പ്രയോഗങ്ങള്‍ ഇവിടെ ആരംഭിച്ചത്. കഴിഞ്ഞ വര്‍ഷവും കളനാശിനി പ്രയോഗം നടത്തുകയും, കുടിവെള്ളം മലിനപ്പെടാന്‍ സാധ്യതയുള്ളതിനാല്‍ ഇത്തരത്തില്‍ കീടനാശിനി പ്രയോഗിക്കരുതെന്ന് അവശ്യപ്പെടുകയും ചെയ്തിരുന്നു.
എന്നാല്‍ ഇതൊന്നും പരിഗണിക്കാതെ ഇയാള്‍ വീണ്ടും ഇവിടെ കളനാശിനി പ്രയോഗിക്കുകയാണ് ചെയ്തതെന്ന് ആരോപണം. 2016ല്‍ ഇവിടുത്തെ കൃഷിയിടങ്ങളില്‍ അനുമതിയില്ലാത്ത കീടനാശിനി തളിക്കപ്പെട്ടതുമായി ബന്ധപ്പെട്ട് പനമരം കൃഷി ഒഫിസര്‍ക്കും സബ് കലക്ടര്‍ക്കും മറ്റും പരാതി നല്‍കിയിരുന്നെങ്കിലും പരാതി ശരിയാംവിധം അന്വേഷിക്കുന്നതിനോ പരിഹരിക്കുന്നതിനോ ആവശ്യമായമായ ഇടപെടലുകള്‍ ഉണ്ടായില്ല.
പ്രശ്‌നപരിഹാരത്തിനാവശ്യമായ ഇടപെടലുകള്‍ നടത്തിയിട്ടില്ല എന്ന് പ്രദേശ വാസിയായ ദിലീപ് പറയുന്നു. ആരോഗ്യ സുരക്ഷാ മുന്‍കരുതല്‍ എന്ന നിലയില്‍ ജനവാസ കേന്ദ്രങ്ങളിലെങ്കിലും രാസകീടനാശിനികള്‍, കുമിള്‍നാശിനികള്‍, കളനാശിനികള്‍ എന്നിവയുടെ പ്രയോഗം പൂര്‍ണമായും നിര്‍ത്തലാക്കുക എന്നതാണ് അഭികാമ്യമെന്ന് ഈ വിഷയത്തില്‍ ഗവേഷകനായ ദിലീപ്കുമാര്‍ പറഞ്ഞു.
പകരം കീടനാശിനിരഹിതജൈവകൃഷി നടപ്പിലാക്കുന്നതിന് വേണ്ട സാങ്കേതിക സഹായവും സഹകരണവും കര്‍ഷകര്‍ക്ക് ലഭ്യമാക്കണമെന്നും ആവശ്യമുയരുന്നുണ്ട്.