ന്യൂഡല്‍ഹി: പുതിയ കോണ്‍ഗ്രസ് അധ്യക്ഷനെ കണ്ടെത്താന്‍ രാഹുല്‍ ഗാന്ധി നിര്‍ദേശിച്ച സമയപരിധി ഇന്നവസാനിക്കേ  പകരക്കാരനെ കണ്ടെത്താനാകാതെ വലയുകയാണ് കോണ്‍ഗ്രസ് നേതൃത്വം. ഒരു മാസം കഴിഞ്ഞിട്ടും രാഹുലിന് പകരം മറ്റൊരാളെ കണ്ടെത്താന്‍ കോണ്‍ഗ്രസിന് കഴിഞ്ഞിട്ടില്ല. രാഹുല്‍ ഗാന്ധിയ്ക്ക് പകരക്കാരനെ കണ്ടെത്താന്‍ കഴിയുന്നില്ലെന്നും നെഹ്‌റു കുടുംബം തന്നെ കോണ്‍ഗ്രസിനെ നയിക്കണമെന്നാണ് പൊതു വികാരമെന്നും കൊടിക്കുന്നില്‍ സുരേഷ് പറഞ്ഞു.

ലോക്‌സഭാ തെരഞ്ഞെടുപ്പിലുണ്ടായ കനത്ത തോല്‍വിക്ക് പിന്നാലെ പാര്‍ട്ടി അധ്യക്ഷ സ്ഥാനം ഒഴിയുകയാണെന്നും ഒരു മാസത്തിനകം തനിക്ക് പകരക്കാരനായി മറ്റൊരാളെ കണ്ടെത്തണമെന്നും രാഹുല്‍ ഗാന്ധി കോണ്‍ഗ്രസ് നേതൃത്വത്തോട് ആവശ്യപ്പെട്ടിരുന്നു. ഇപ്പോഴും അധ്യക്ഷ സ്ഥാനത്തേക്കില്ലെന്ന കടുംപിടുത്തത്തിലാണ് രാഹുല്‍ ഗാന്ധി.