കണ്ണൂര്‍ സിറ്റി: കണ്ണൂര്‍ കോട്ടയിലെ ലൈറ്റ് ആന്‍ഡ് സൗണ്ട് ഷോയുടെ ആദ്യ ഷോ സാങ്കേതിക തകരാര്‍ കാരണം മുടങ്ങി. ഏറെ നാളത്തെ കാത്തിരിപ്പിന് ശേഷമാണ് ഇന്നലെ ഷോ ജനങ്ങള്‍ക്കായി തുറന്നുകൊടുത്തത്. എന്നാല്‍ വൈകുന്നേരം നടന്ന ആദ്യ പ്രദര്‍ശനം തന്നെ സാങ്കേതിക തകരാര്‍ മൂലം മുടങ്ങുകയായിരുന്നു. നൂറിലധികം പേരാണ് ആദ്യ പ്രദര്‍ശനം കാണാനെത്തിയിരുന്നത്. ഷോയില്‍ വെറും ശബ്ദം മാത്രമാണുണ്ടായിരുന്നത്. ദൃശ്യങ്ങളും മറ്റും തെളിയാത്തതിനാല്‍ പ്രദര്‍ശനം ഉപേക്ഷിക്കുകയും പ്രദര്‍ശന ഫീസായി ഇടാക്കിയ 100 രൂപ കാണികള്‍ക്ക് തിരിച്ച് നല്‍കുകയും ചെയ്തു. കഴിഞ്ഞ നിയമസഭാ തെരഞ്ഞടുപ്പ് സമയത്ത് അന്നത്തെ മുഖ്യമന്ത്രി ഉമ്മന്‍ ചാണ്ടി തിടുക്കപ്പെട്ട് ഉദ്ഘാടനം ചെയ്ത ലൈറ്റ് ആന്‍ഡ് സൗണ്ട് ഷോ പരീക്ഷണ പ്രദര്‍ശനത്തില്‍ മാത്രം ഒതുങ്ങിയതായിരുന്നു. കഴിഞ്ഞ ദിവസങ്ങളില്‍ നടത്തിയ പരീക്ഷണ പ്രദര്‍ശനങ്ങളില്‍ സാങ്കേതിക പിഴവൊന്നുമുണ്ടായിരുന്നില്ലെന്നും വിദഗ്ധരുടെ സഹായത്താല്‍ പിഴവ് കണ്ടെത്തി ഉടന്‍ തന്നെ പ്രദര്‍ശനം തുടങ്ങുമെന്നും അധികൃതര്‍ അറിയിച്ചു.