തിരുവനന്തപുരം: സംസ്ഥാനത്തെ വിവരാവകാശ കമ്മിഷന്‍ അംഗങ്ങളെ നിയമിക്കാത്തതു മനഃപൂര്‍വമല്ലെന്ന് മന്ത്രി എ കെ ബാലന്‍. നിയമസഭയില്‍ വി.ഡി സതീശന്റെ സബ്മിഷന് മുഖ്യമന്ത്രിക്കു വേണ്ടി മറുപടി നല്‍കുകയായിരുന്നു അദ്ദേഹം. നിയമപരമായ പ്രശ്‌നങ്ങള്‍ കാരണമാണ് നിയമനം വൈകുന്നത്. മുഖ്യവിവരാവകാശ കമ്മിഷണര്‍ ഉള്‍പ്പടെ ആറു കമ്മിഷണര്‍മാരെയാണ് നിയമിക്കേണ്ടത്.
കമ്മിഷന്‍ അംഗങ്ങളെ നിയമിക്കാനുള്ള ശുപാര്‍ശ ഗവര്‍ണര്‍ തള്ളിയിരുന്നു. നിയമനം നീതിപൂര്‍വമല്ലെന്നും നടപടിക്രമങ്ങളില്‍ വീഴ്ച നേരിട്ടതായും ഹൈക്കോടതി സിംഗിള്‍ ബഞ്ച് വിധിച്ചിരുന്നു. ഈ വിധിക്കെതിരേ ഡിവിഷന്‍ ബഞ്ചിനെ സമീപിക്കുകയും സിഗിംള്‍ ബഞ്ച് വിധി റദ്ദാക്കുകയും ചെയ്തു. റിട്ട് അപ്പീല്‍ തീര്‍പ്പാക്കുന്ന മുറയ്ക്ക് നിലവിലെ ഒഴിവു നികത്താനാവും.
വിഷയം എ.ജിയുടെ ശ്രദ്ധയില്‍പ്പെടുത്തി നടപടികള്‍ ത്വരിതപ്പെടുത്തുമെന്നും മന്ത്രി അറിയിച്ചു. വിവരാവകാശ കമ്മിഷനില്‍ ആറുപേരുടെ സ്ഥാനത്ത് ഒരാള്‍ മാത്രമാണുള്ളതെന്ന് വിഡി സതീശന്‍ ചൂണ്ടിക്കാട്ടി. 15000ത്തോളം അപേക്ഷകളാണ് കെട്ടികിടക്കുന്നതെന്നും സതീശന്‍ പറഞ്ഞു.