എ.ആര്‍ നഗര്‍: പ്രളയമുണ്ടായ ഘട്ടത്തില്‍ നീന്തലറിയാത്തതിനാല്‍ പ്രയാസങ്ങളനുഭവിച്ച സാഹചര്യത്തില്‍നിന്ന് പാഠമുള്‍ക്കൊണ്ട് കുട്ടികള്‍ക്ക് നീന്തല്‍ പരിശീലന പദ്ധതിയുമായി പുതിയത്ത് പുറായ എ.എ.എച്ച്.എല്‍.പി സ്‌കൂള്‍.
സ്‌കൂള്‍ മാനേജര്‍ ഡോ. എ. മൊയ്തീന്‍ കുട്ടിയുടെ വീടിനോടനുബന്ധിച്ചുള്ള അരീക്കാട്ട് പള്ളിക്കുളമാണ് പരിശീലനത്തിനായി സജ്ജമാക്കിയത്. നാളെ രാവിലെ 9.30ന് പരിശീലനത്തിന്റെ ഔപചാരിക ഉദ്ഘാടനം ജില്ലാ പഞ്ചായത്ത് പ്രസിഡന്റ് എ.പി ഉണ്ണിക്കൃഷ്ണന്‍ നിര്‍വഹിക്കും.ഹയര്‍ സെക്കന്‍ഡറി അഡ്മിഷന് നീന്തല്‍ അറിയാവുന്നവര്‍ക്ക് വെയിറ്റേജ് മാര്‍ക്കും ലഭിക്കുന്നുവെന്നതിനാല്‍ പദ്ധതിക്ക് രക്ഷിതാക്കളുടെ പൂര്‍ണ പിന്തുണയും സഹകരണവും ലഭിക്കുന്നു. ആദ്യ പടിയായി മൂന്ന്, നാല് ക്ലാസുകളിലെ ആണ്‍കുട്ടികള്‍ക്കാണ് പരിശീലനം നല്‍കുന്നതെന്ന് ഹെഡ്മാസ്റ്റര്‍ കെ.ടി കമ്മു, പദ്ധതി കോഡിനേറ്റര്‍ എം.പി അബ്ദുല്‍ അസീസ് എന്നിവര്‍ അറിയിച്ചു.