ഇന്ന് രാത്രി 12.30ന് നടക്കുന്ന നാലാം ക്വാര്‍ട്ടറില്‍ ഉറുഗ്വെയും പെറുവും തമ്മില്‍ ഏറ്റുമുട്ടും. കളിച്ച മൂന്ന് മത്സരത്തില്‍ രണ്ടിലും ജയം സ്വന്തമാക്കിയാണ് എഡിസണ്‍ കവാനിയും കൂട്ടരും ഇന്ന് പെറുവിനെ നേരിരുന്നത്. ആദ്യ മത്സരത്തില്‍ ഇക്വഡോറിനെ എതിരില്ലാത്ത നാലു ഗോളുകള്‍ക്കാണ് ഉറുഗ്വെ പരാജയപ്പെടുത്തിയത്. ജപ്പാനുമായുള്ള രണ്ടാം മത്സരം 2-2 എന്ന സ്‌കോറിന് സമനിലയില്‍ കലാശിച്ചു.
നിലവിലെ ചാംപ്യന്‍മാരായ ചിലിയെ എതിരില്ലാത്ത ഒരുഗോളിനും തകര്‍ത്താണ് ഉറുഗ്വെ ക്വാര്‍ട്ടറിലെത്തിയത്. സി ഗ്രൂപ്പില്‍ ഏഴ് പോയിന്റുമായി ഗ്രൂപ്പ് ചാംപ്യന്‍മാരായിട്ടാണ് ഉറുഗ്വെ ക്വാര്‍ട്ടറിലെത്തിയിട്ടുള്ളത്. അതേസമയം, ബ്രസീലുള്‍പ്പെടുന്ന ഗ്രൂപ്പില്‍ മികച്ച മൂന്നാം സ്ഥാനക്കാരായി ക്വാര്‍ട്ടറിലെത്തിയ പെറുവിന് ഇന്ന് ജീവന്‍മരണ പോരാട്ടമായിരിക്കും.
കാരണം മൂന്ന് മത്സരത്തില്‍ ഒന്നില്‍ മാത്രമാണ് പെറു ജയിച്ചിട്ടുള്ളത്. മികച്ച മുന്നേറ്റനിരയും ഗോഡിന്‍ നയിക്കുന്ന പ്രതിരോധ നിരയും ഉള്ള ഉറുഗ്വെയെ കീഴടക്കണമെങ്കില്‍ പെറുവിന് കഠിനാധ്വാനം ചെയ്യേണ്ടി വരും.