പുത്തനത്താണി: തിരൂര്‍ മണ്ഡലത്തില്‍ തിരുനാവായ കുടിവെള്ള പദ്ധതി നടപ്പിലാക്കാതിരിക്കുവാന്‍ സര്‍ക്കാര്‍ തലത്തിലും വകുപ്പുതലത്തിലും രഹസ്യ നീക്കങ്ങള്‍ നടക്കുന്നതായി ആക്ഷേപം. കല്‍പകഞ്ചേരി, വളവന്നൂര്‍ ഗ്രാമപഞ്ചായത്തുകളിലെ ജനങ്ങള്‍ ഇരുപത് വര്‍ഷത്തിലധികമായി ഏറെ പ്രതീക്ഷയര്‍പ്പിച്ചിരുന്ന പദ്ധതിയായിരുന്നു തിരുനാവായ കുടിവെള്ള പദ്ധതി. ഇതിന്റെ ഒന്നാം ഘട്ടത്തില്‍ തിരുനാവായ, ആതവനാട്, മാറാക്കര പഞ്ചായത്തുകളില്‍ കുടിവെള്ള വിതരണ പ്രവര്‍ത്തനങ്ങള്‍ ഭൂരിഭാഗവും പൂര്‍ത്തീകരിച്ചു. എന്നാല്‍ കല്‍പകഞ്ചേരി, വളവന്നൂര്‍ പഞ്ചായത്തുകള്‍ക്കുള്ള രണ്ടാം ഘട്ട പദ്ധതികള്‍ക്കുള്ള ഫണ്ടണ്ട് കേന്ദ്ര- സംസ്ഥാന സര്‍ക്കാരുകള്‍ പിന്‍വലിച്ചതായാണ് ആക്ഷേപം.
നിലവില്‍ വാട്ടര്‍ ടാങ്കുകളുടെ നിര്‍മാണം പൂര്‍ത്തിയായി. സി.മമ്മൂട്ടി എം.എല്‍.എ യുടെ ആസ്തി വികസന ഫണ്ടില്‍ നിന്നും പൈപ്പുകള്‍ സ്ഥാപിക്കുവാന്‍ 50 ലക്ഷം രൂപ അനുവദിച്ച് പ്രവൃത്തികള്‍ നടക്കുകയാണ്. കുട്ടികളത്താണിയിലെ ട്രീറ്റ്‌മെന്റ് പ്ലാന്റും പൂര്‍ത്തിയായി. ട്രീറ്റ്‌മെന്റ് പ്ലാന്റില്‍ നിന്നും ബാഫഖി യതീംഖാനക്കു സമീപം സ്ഥാപിച്ചിരിക്കുന്ന പ്രധാന ടാങ്കിലേക്ക് പൈപ്പിടുന്നതില്‍ പൊതുമരാമത്ത് തടസങ്ങള്‍ ഉയര്‍ത്തി പദ്ധതി വൈകിപ്പിക്കുകയാണെന്ന് ആരോപണമുണ്ട്. മാത്രമല്ല, കേരള വാട്ടര്‍ അതോറിറ്റി 54 ലക്ഷം രൂപ അടച്ചിട്ടില്ലെന്നു പി.ഡബ്ലിയു.ഡിയും, എസ്റ്റിമേറ്റ് പി.ഡബ്ലിയു.ഡി തന്നില്ലെന്നു വാട്ടര്‍ അതോറിറ്റിയും പരസ്പരം പഴിചാരി കുടിവെള്ള പദ്ധതിയെ ഇല്ലാതാക്കുവാന്‍ ശ്രമം നടത്തുന്നതായാണ് പരാതി ഉയര്‍ന്നിരിക്കുന്നത്.
26 കോടിരൂപയാണ് എം.എല്‍.എ യുടെ ഇടപെടലിലൂടെ അനുവദിച്ചത്. ഇതില്‍ പത്ത് കോടി രൂപ ലഭിച്ചു. ഭരണാനുമതി ലഭിച്ച പദ്ധതിക്ക് കേന്ദ്രം ഫണ്ട് നല്‍കിയില്ലെന്ന് പറഞ്ഞ് സംസ്ഥാന സര്‍ക്കാരും കൈയൊഴിഞ്ഞ അവസ്ഥയാണിപ്പോള്‍. കല്‍പകഞ്ചേരി, വളവന്നൂര്‍ പഞ്ചായത്തുകളിലെ കുടിവെള്ള പദ്ധതികള്‍ യാഥാര്‍ഥ്യമാകാന്‍ ഇനിയും എത്ര കാലം കാത്തിരിക്കണമെന്ന ആശങ്കയിലാണ് ജനങ്ങള്‍.