കാന്‍പൂര്‍: ഉത്തര്‍പ്രദേശിലെ കാന്‍പൂരില്‍ ജയ് ശ്രീറാം വിളിക്കാന്‍ വിസമ്മതിച്ച 16കാരനെ ബൈക്കിലെത്തിയ സംഘം മര്‍ദിച്ചു. പരമ്പരാഗതമായ തൊപ്പി ധരിച്ച മുസ്‌ലിം ബാലനെ ബൈക്കിലെത്തിയ സംഘം നിര്‍ബന്ധിച്ച് ജയ് ശ്രീറാം വിളിക്കാന്‍ ആവശ്യപ്പെട്ടെങ്കിലും കുട്ടി ഇതിന് തയാറായില്ല. ഇതേതുടര്‍ന്നായിരുന്നു മര്‍ദനമെന്ന് പൊലിസ് അറിയിച്ചു.
കാന്‍പൂരിനടുത്ത ബാര സ്വദേശിയായ മുഹമ്മദ് താജിനെയാണ് മര്‍ദിച്ചത്. കിദ്വായി നഗറിലെ പള്ളിയില്‍ നിസ്‌കാരം കഴിഞ്ഞ് മടങ്ങും വഴിയായിരുന്നു സംഭവം. ബൈക്കിലെത്തിയ സംഘം താജിനെ തടഞ്ഞുനിര്‍ത്തി തൊപ്പി ധരിച്ചതിനെ എതിര്‍ക്കുകയും തുടര്‍ന്ന് ജയ് ശ്രീറാം വിളിക്കാന്‍ നിര്‍ബന്ധിക്കുകയുമായിരുന്നുവെന്ന് ബാരാ പൊലിസ് ഇന്‍സ്‌പെക്ടര്‍ സതീഷ് കുമാര്‍ സിങ് പറഞ്ഞു.
അക്രമികള്‍ പറഞ്ഞത് അനുസരിക്കാതിരുന്നതോടെയാണ് മര്‍ദനമുണ്ടായത്. തന്റെ തൊപ്പി തട്ടിയെടുത്ത് കീറിയെറിയുകയും തുടര്‍ന്ന് മര്‍ദിക്കുകയും ചെയ്തുവെന്ന് കുട്ടി പൊലിസില്‍ നല്‍കിയ പരാതിയില്‍ പറഞ്ഞു. തൊപ്പി ഈ പ്രദേശത്ത് ധരിക്കുന്നത് നിരോധിച്ചിട്ടുണ്ടെന്ന മുന്നറിയിപ്പും സംഘം നല്‍കിയതായും മുഹമ്മദ് താജ് പറഞ്ഞു.
മര്‍ദനമേറ്റതോടെ രക്ഷതേടി കുട്ടി അലറിക്കരഞ്ഞതോടെ തൊട്ടടുത്തുള്ള ചില കടക്കാര്‍ ഓടിയെത്തിയതോടെ സംഘം ഓടി രക്ഷപ്പെട്ടു.